Танһчин деед үзгин болн цутхлнг райодын эдл-ахус эрт хаврин культурмуд тәрлһнә көдлмш төгсәв. Ар үзгин райодт эн көдлмшиг шинкн эклв.

Элст балһснд түрүн болж Әрәсән боксермуд сурһулин болн дамшлтын белдвр кех. Эннь Әрәсән чемпионатын өмн болжах сүл белдврин девснг болжана. Марһан эн жилин май сард болх.

Элст балһсна хаалһсар дегд олн машид гүүлгәд, бәәрн улст әәмшг учрасн деерән, ик боомтг күргжәнә. Эн төр хурц төрт хүврв. Көдлмшин өдрмүдт өрүн-асхнд дегд олн машид цуглрад, йовж чадхш.

Эндр цуг Әрәсәд ЕГЭ-н шүүвр болзгаснь эрт өггджәнә. Хальмг танһчд энүг һурвн күн өгчәнә. Тер саамд государственн шүүвр өгх болзг күртл нег сар үлдв.

Эндр эрдм сурһулин көдләчнрин мергжлт өөдлһнә хальмгин институт далн тавн жилин өөнән темдглжәнә.

Уудг усна, газин болн дула өглһнә халхар социальн кемжә орулһна шиидвриг Әрәсән правительств зогсав.

Гүлгн гемтә улст медицинск дөн күрглһнә халхиг ясрулһна төлә федеральн бюджетас мана танһчд һурвн зун сай арслнг йилһж өггдх.

Эндр Хальмгин олн-әмтнә хуралын зурһадгч сессь болв. Энүнд депутатнр танһчин бюджетин туск, экономическ политикин болн арһлачнрин делгрлтин төрмүдәр күүндвр кегдв.

Хаврин дольган фестивальд диилвр бәрв, ик байртаһар бичкдүд хәрж ирв. Иим нертә фестиваль марһан Москва балһснд болв. Энүнә ашар негдгч тойгта Элстин бичкдүдин көгжмин сурһульчнр хойр түрүн орм эзлв.

Хальмг танһчд нилх төрлһнә то өнгрсн улсин тооһас ик болв. Сүл цагт нилх төрлһнә то икдв. Элст балһсна төрлһнә герт гиигрсн экнр энд ик сольвр болв гиж келжәнә.

Эн жиләс авн олн давхрта гермүдт капитальн ясвр келһнә зокал сольгджана.

Хальмг танһчд бамб цецгүдин фестиваль төгсв. Һурвн өдрин эргцд Приютненск районд бәәх өвәрц бамб цецгүдин арлд һурвн минһн күн одв.

Хальмгин цутхлнг хурлд Бурхн Багшин алтн сүмд Дрепун Гоманг дацнгин гелнгүд Чакрасамвара Бурхна мандал тосхжана. Төвдин келнәс Чакрасамвара гисн үг мөнк ач-тус, цаһан санан гиж орчулгдна.

“Лазуревый цветок”. Иим нертә хазгудын дууна бичкдүдин түрүн ансамбль бүрдәгдв. Элст балһсна хазгудын одмн Константин Кирпилевин седвәрәр эн коллектив минь одахн тогтагдв.

Әрәсән оютнрин бәәдл-жирһлд хамгин икәр күләгджәсн йовдл эклв. Әрәсән оютнрин хавр нертә керг-үүлдвр мана орн-нутгин цуг регионмудт эклв. Региональн девснгд танһчин деед болн дунд сурһулин заведеньсин оютнр орлцжана.