Олн давхрта гермүдт капитальн ясвр келһнә зокал сольгджана

Эн жиләс авн олн давхрта гермүдт капитальн ясвр келһнә зокал сольгджана. Ода патьрмудын эздүд ясвр кех оурлж өгнс мөнгән хойр эв-арһар цуглулж чадх — региональн операторт эс гиж олн давхрта герин шишлнг счет олзлж болх. Ода капитальн ясвр кехин төлә кедү мөнг өгх кергтә, әмтнә орулж өгсн мөнгн яһж олзлгдх.

Олн давхрта гермүдин эздүд альдаран эврәннь мөнгән оурлж өгхин тускар шиидвр авх дала цаг үлдсн уга. Ясврин мөнгиг эврәннб герин счетд эс гиж региональн оператормудт йовулж болх. Кедү арлснг өгх яһж эн мөнгиг олз-тустаһар олзлхин тускар эдн ухалжана. Эн жилин август сард бәәцин туслмжин квитанцд герин капиатальн ясврт өгх мөнгн бас бичгдх. Капитальн ясврт йовулх мөнгиг альдаран йовулхин тускар шиидвриг май сарин хөрн тавн күртл батлж авх кергтә.

Оркия Харгудинован келсәр, эднә герт капитальн явр кегдәд уга. Советин йосна цагас авн герин ораһар дусал дусна.

Оркия Харгудинова негдгч микрорайона хөрн һурвдгч герт энүг тосхнас авн жирн дөрвдгч жиләс авн бәәнә. Эн жилмүдин эргцд энүнд нег чигн дәкж капитальн ясвр кегдсн уга. Олн давхрта герин эздүд балһснд түрүн болж ясврин мөнгиг региональн операторт йовулхар шиидв. Иим оператор шишлнг счет секх. Энүнд патьрмудын эздүдин мөнгн цуглрх. Энүнә хөөн кезә ясвр кехинь күләх кергтә. Иим кевәр мөнг цуглулхла гермүдин эздүд кесг хаһлх төрмүдәс гетлнә.

Герин комитетин ахлач Эльза Шашанован келсәр, патьрмудын эздүд региональн операториг шүүж авв. Эднд дөнцл мөнгн өггдх. Зәрм әмтн ясвр кехин төлх цуг мөнгиг өгч чаджахш. Эднә гер тәвн жил хооран тосхгдв. Тер цагас авн капитальн ясвр кегдәд уга.

ВЗК: Клыковин нертә уульнцд бәәх әмтн ода күртл мөнгән яһж цуглулхин төлә медәд уга. Кирсан Худобченок келсәр, эднә дөрвн давхрта гер Элстин цутхлнгд бәәсн талдан гермүдәс му дүрсәрн йилһрнә. Энүнә тоолврар, патьрмудын эздүд мөнг цуглулһна ямаран чигн эв-арһ шүүж авснь ик чинр зүүжәхш. Хамгин һол төрнь — эднә герин ора, инженерн систем, электрокүчнә болн усна сурвлжна ясвр кезә кехнь эдниг үүмүлжәнә. Капитальн ясвр чеерүдәр кегдх. Кемр хойр гер әдл балл авхла, капитальн ясвр хуучн герт кегдх. Дөрвн давхрта гер болхла жирн негдгч жилд тосхгдсмн.

Кирсан Худобченок келсәр, хур орхла герин ораһар дусал дусна, усн патьрмудт бас күрнә.

Элст балһсна зәрм улсин тоолврар, кемр мөнгн шишлнг счетд цуглрхла, ямаран кясвр кехин тускар патьрмудын эздүд эврән шиидвр авх. Эврәннь мөнгән һардачнр сексн сангд йовулх керг уга болх. Болв энүнә тускар шиидвр күн болһн эврән батлж авх зөвтә. Олн давхрта гермүдин капитальн ясвр ода олн улст ик хурц төрт хүврв.

Танһчин ЖКХ-н болн энергетикин министрин дарук Виктория Мангутован келсәр, кемр гермүдин эздүд май сарин хөрн тавн күртл мөнгән яһж цуглухин тускар шиидвр эс авхла, бәәрн залврин органмуд эврән иим шиидвр авх. Государствин халхас олн давхрта цуг гермүдт дөн күрггдх. Ямаран чигн эв-арһ шүүж авсн бийнь эднд дөнцл мөнгн өггдх.

Капитальн ясвр кехин төлә сар болһн орулж өгх мөнгнә кемжәнә тускар келхлә, энүнә тарифиг регион болһн эврән батлж авх зөвтә. Ода Хальмг танһючд нег дөрвлжн метрт тавн арслнг хөрн деншг өгх кергтә. Тегәд эврәннь мөнгән кенд йовулхин тускар болһамжтаһар шиидвр батлж авх кергтә.

Ээнән Ольга, Очра Сергей