Эндр Элст балһснд Крымын улсин шиидвр дөннлһнә митинг болх. Энүг бүрдәж давулх седвәр олна элчнр оурлж өгсмн. Энүнд белдвр кехин тускар өцклдүр танһчин олна палатыын гешүд күүндв.

Хальмг танһчин олна палат Украинд тогтсн бәәдлин тускар күүндвр кев. Сүүрт келн-улсин цутхлнгудын элчнр орлцв. Украинд бәәх улсин тускар үүмжәхән сүүрт орлцачнр медүлв.

Эндр Хальмг танһчин ачта артистк Елена Судакова ончта өөнән темдглжәнә. Шог наадна болн дармин орсин театрин нүүрлгч артистк театр бүрдснәс авн ода күртл көдлжәнә.

Элстин лицейд эндр нанонеделя керг-үүлдврин аш диглх. Эн сурһулин заведень мана танһчд нанатехнологин эв-арһд нерәдгдсн цугәрәсән керг-үүлдврт орцлжах ор һанцхн учреждень болжана.

Элст балһснд сө арвн хойр часла тас харнһу таг болж одна. Урднь электрогерл һаза энүнәс эрт унтрадг бәәсмн. Элст балһсна электрокүч әрвлһнә кемжән цөн жил хооран орулгдв.

Давсн долан хонгт танһчин хаалһст арвн хойр зеткртә йовдл учрв. Энүнә ашт хойр күн әмнәсн хаһцв, арвн долан күн шавтв.

Православн шажнд шүтдг улс хойр долан хонгтан ик мацг бәржәнә. Эннь Пасхин сергмжтә байрин өмн өргнд бәрдг хамгин чанһ неквртә мацг болжана. Долан хонг болһн эврә нертә болн чинртә.

Элстин зурһадгч микрорайона олн давхрта гермдүин эздүдиг оржах хавр байрлулжахш. Цасн хәәләд, ораһар дусал дусжана. Эднә патьрмудт цандг тогтв.

Хальмг танһчд шүлгләнә сән өдр темдглв. Эн өдр Көглтин Даван һарсн өдрлә ирцүлж давулгдна. Нертә бичәч күмн әмтни туужд орад, эврә ик тәвцән орулсн шүлгч болжана.

Хальмгин спортсменмүд нүүрлгч орм эзлв. Ейск балһснд эрдм-сурһулин учрежденьсин дунд мини-футбольн марһан болв. Эн дөрлдән Мини-футбол — в школу нертә цугәрәсән программар бүрдәж давулгдв. Мана танһчас марһанд дөрвдгч школын сурһульчнр орлцв.

Дәкәд нег тодлад келхлә, хальмгин шүлгләнә сән өдр мана танһчин олн-әмтнә шүлгч Көглтин Даван һарсн өдрлә ирцүлж тогтагдв. Эндр шүлгч дигтә йирн хойр нас зүүх бәәсмн.

Өдгә цагт мана танһчд углж тәвгдсн видеокамерин төрәр ик күүндвр һарчана. Элст балһснд цифрин зәнглһнә эв-арһ олзлжах Әәмшг уга балһсн нертә федеральн программ хойр минһн нәәмдгч жиләс авн көдлжәнә.

Танһчин селән болһнд фельдшерск-акушерск пунктмуд хадһлх кергтә. Иим даалвһр танһчин толһач Алексей Орлов өгсн билә.

Эн жилин июль сард мана регионд командн-штабын мобилизационн сурһуль болх. Энүнд Хальмг танһчин, Астраханск областин болн Дагестана цергә бүрдәц орлцх. Эдниг Өмн үзгин цергә округин штабын ахлач һардхмн.

Хальмг танһч Хальмгин болн Әрәсән олн-әмтнә артистк Валентина Гаряеван ончта өөнд белдвр кежәнә. Мартын нәәмнд мана нертә дууч далн тавн нас зүүв.Хальмг танһчин алтн дун.