Хальмгин онкологическ церглт дөннлһнә мөнгн йилһж өггдх

Гүлгн гемтә улст медицинск дөн күрглһнә халхиг ясрулһна төлә федеральн бюджетас мана танһчд һурвн зун сай арслнг йилһж өггдх. Энүнә тускар эн жилин март сард танһчин правительствин болн Әрәсән эрүл-менд харлһна министерствин хоорнд зөвшәлт батлж авгдла. Өдгә цагт онкологическ церглт Хальмгт күнд бәәдлд тусв. Мергжлттә специалистнр дутжана, кергтә хорас уга, оборудовань далн процентд хуучрад, эвдржәнә.

Эмч-радиолог Валентина Менкиева танһчин онкологическ диспансерт һучн жилдән көдлжәнә. Эн жилмүдин эргцд энүнә көдлжәх гамма аппарат нег дәкж сольгдв. Энүнә дөнгәр гүлгн гемин цуг хавдриг эмнүлнә. Ода көдлжәх аппарат хөрн жил хооран тәвгдж. Эн оборудовань ода күртл көдлжәсн бийнь, энүг хуучн гиж тоолна.

Танһчин онкологическ диспансерин эмч-радиолог Валентина Менкиеван келсәр, түрүн иим аппарат арвн жилдән көдлв. Эн оборудовань болхла хөрн жилдән көдлжәнә. Энүг сольх кергтә.

Эннь болхла рентген лабораторь. Энүнд күүнә яснас авн дотр оргнамуд күртл шинжлж хәләнә. Энд көдлжәх аппаратмуд дегд хуучн. Көдләчнр келсәр рентген зург тодрха болхш.

Онкодиспансерин талдан чигн оборудовань бас иим му бәәдлд тусв. Эдн далн процентд хуучрж. Тер мет ода онкологическ диспансерт эм дутжана, көдлдг улс баһ болжана, кергтә хорас немхлә бас сән болх. Диспансерин гермүд иим көдлмш кехд ирлцжәхш. Нег үлү, эдн нег-негнәс хол һазрт бәәнә. Тегәд гемтә улст өөдән чинртә сән медицинск дөн күргж болжахш. Энд олзлгджах эмнүлһнә эв-арһ Әрәсән талдан регионмудт болн һазадын ордудт ик кезәнәс авн олзлгджахш. Тегәд чигн гүлгн гемтә улс талдан регионмудт одад эмнүлһ авчана.

Онкологическ диспансерин ах эмч Земфира Мутулован келсәр, шин оборудовань углж тәвхин төлх кергтә хорас бәәнә. Давсн жилд поликлиникин гер капитальн ясврин хөөн эдлврт орулгдла. Эндоскопическ оборудовань тәвх хора бас кергтә, рентген кабинет бас шинрүлх зура бәәнә.

Хальмг танһчин правительствин болн Әрәсән эүрл-менд харлһна министерств хоорнд батлж авсн зөвшәлтәр медицинск дөн күрглһнә халхар онкологическ церглтиг шин кемжәнд күргх зөвтә. Эн зөвшәлтәр һурвн зун һучн сай арслнг йилһж өггдх зөвтә.

Хальмгин эрүл-менд харлһна министерствин әнгин ахлач Елена Ользееван келсәр, федеральн бюджетас мөнгн ирлцнһү невр күцәхлә ирнә. Тиим нег некврнь танһчин хазнас һучн негн сай арслнг һарһж өгх кергтә. иим таалыг темдглсн болзгт бүрдәх даалһвр бәәнә.

Тер саамд цаглань гем илткж авгдг оборудовань уга болад, өөдән чинртә медицинск дөн эс күргнәс көлтә Хальмг танһчд гүлгн гемәр гемтсн улсин тө өсәд йовна. Давсн жилин эргцд долан зун нәәмн күн диспансерин тоод авгдв. Ода ут-тоодан иим гемтә һурвн дундур минһн күн бәәнә. Хамгин олар оошгин болн арсна гүлгн гемәр әмтн гемтнә. Гүлгн гемәр гемтжәх улс дегд ора эмчин хәләврт ирж орна. Тегәд чигн иим гемәс көлт олн улс өнгржәнә. Нег минһн күүнә тоод зун тәвн күн хорна. Тегәд танһчин онологическ церглтиг шинрүлхлә, иргчдән эмчнр сән медицинск дөн күргж чадх, гемтә улс ахр болзгт эдгх.

Елена Алексенко, Котина Валерий, Хавтхна Анатолий