Бамб цецгүдин фестиваль Хальмг танһчд төгсв
Хальмг танһчд бамб цецгүдин фестиваль төгсв. Һурвн өдрин эргцд Приютненск районд бәәх өвәрц бамб цецгүдин арлд һурвн минһн күн одв. Эн керг-үүлдврин һол күцлнь — Улан Дегтрт орулгдсн бамб цецгүдиг хадлһна төрт олн улс оньган тусхахин төлә иим фествиаль бүрдәгдв. Эн төриг бүрдәһәчнр хаһлж чадв аль угай?
Бамб цецгин фестивальд олн улс ирж орлцв. Артистнр, спортсменмүд, Элст балһсна бәәрн улс болн гиичнр ирв. Зәрм әмтн өрк-бүлтәһән бичкдүдтәһән ирж. Лариса Авдошина болн энүнә аваль Мосвка балсһнас ирж. Эдн эконтуристнр гиж бийән нерәднә. Лариса Авдошина келсәр, хальмгин у-өргн тег әмтнә зүрк авлна. Тег мәд болж медгднә. Иим ке-сәәхн һазр үзсндән ик байрта бәәнә.
Кесг гектарин аһуд шар, цаһан, оошг, улан бамб цецгүд ик холас налхалж үзгднә. Ик холас хәләхлә эдн йоста өнгтә кевс болж медгднә. Алдр Торһн замар йовж йовсн кувцнр арвн доладгч зун жилмүдт бамб цецгүд эк талдан һазрт күргж. Ода цуг нарта-делкәд эн цецгүдин зун зүсн-зүүл бәәнә.
“Фотоэкспедиция дикой природы” нертә неокоммереческ организацин генеральн директор Дмитрий Мосейкина келсәр, зерлг бамб цецгүд Әрәсән Өмн зүгт урһна. Болв Хальмг теегт эдн йир олар цецгәрнә. Ода зуг иим һурвн һазр үлдв. Хойрнь — Хальмг танһчд, негнь — Ростовск областьд. Хаврин кемд энд бамб цецгүд кевс мет урһна. Энүг күн болһн үзх зөвтә. Иим керг-үүлдврт орлцжах улс бам цецгүдиг таслх зөв уга.
Бамб цецг таслсн улс күсдундур минһн арслнг ял өгх закан бәәнә, деернь цецг болһнас һурвн зун арслнг ял өгх кергтә. Иим засг эн жиләс авн орулгджана. Юнгад гихлә олн әмтн ке-сәхн цецгүдиг таслад ик һару һарһжана. Жил болһн кесг минһн цецгүд таслж авгдна. Тегәд бамб цецгүдиг волонтермул харж хәләжәнә. Төрскн йиртмжән харсхин тускар гиичнрт эдн цәәлһж өгчәнә.
Хальмг танчд бамб цецгүдин фестиваль хойрдад бүрдәж давулгджана. Эн сән седвәриг Әрәсән талдан чигн регионмудт бас дөннв. Иим керг-үүлдврмүд эн жил Ростовск областьд болн бамб цецгүд эс урһдг һазрт Ханты-Мансийск балһснд бүрдәж давулгдх. Эклогин төриг тархлһан керг фотографмудь бас таасгдв. Интернетд эднә тхвсн зургудыг кесг сай улс дурлж хәләжәнә.
Биолог, фотограй Валерий Мосейкина келсәр, эн фестивалин болн хамльг теггин тускар келж өгх санан бәәнә. Эн һазр Әрәсәд хамгин ке-сәәхн һазрин негнь болжана. Хальмгин бамб цецгүд Әрәсән илвтә өвәрц йовдл болжана.
Фестивалин йовудт хальмгин ишкә гермүд, концертн программ үзүлгдв. Олн зүсн марһас бүрдәгдв, халун хотар әмтн тоогдв. Фестивальд орлцсн улс зуг ке-сәәхн тег болн бамб цецгүд хәләхәр ирсн уга. Эдн халмг улсин бәәцлә болн зангшалла өөрхн таньлдж чадв. Зәрм әмтн өрк-бүләрн бичкдүдән дахулад ирж. Эдн эврәннь үрдүдтән йиртмж харлһна сурһмж өгчәнә.
Фестивалин байрт Хальмг танһчин толһач Алексей Орлов орлцв. Хальмгин ишкә гермүд эргж хәләв, олн улсиг бамб цецгүдин байрла йөрәж, хальмгин уул темдг болчг бамб цецгүдиг болн у-өргн теегиг харж хадһлх кергтә гиж келв. Фестивальд орлцсн улс зун арлснг өгв. Эн мөнгәр бамб цецгүдин экн хулдж авгдх, энүнә хөөн энүг тәрлһнә көдлмш бүрдәгдх.
Елена Алексенко, Бевина Мергн, Хавтхна Анатолий
