Эндр хальмг танһчин күч-көлснә государтсвенн инспекц давсн жилин көдлмшин аш диглв. Зака эвдсн хамгин олн йовдл күч-көлснә бооцана, жалв өглһнә болн күч-көлснә харлһна туст илткгдв.

Элст балһсна негдгч тойгта искусствин бичкдүдин школын медлд "Алтн булг" нертә эстетическ делгрлтин цутхлнг секгдв. Шин цутхлнгд бичкн көвүд-күүкд билг-эрдмән дергрүлхин төлә цуг кергтә таал бүрдәгдв.

Эндр Хальмг танһчин правительствин президиумин сүүр болв. Энүнд танһчин хаалһсин му бәәдлин тускар келгдв. Хаалһс яслһна төлә танһчин бюджетас йилһж өггджәх мөнгн күртжәхш.

Эн жиләс авн танһчин эмнүлин учрежденьс нег каналар мөнгәр теткгдхмн. Шин систем ямаран олз-туста болх? Энүнә тускар танһчин правительствин ахлач Игорь Зотов Яшалтинск района больницин коллективла күүндв.

«Насни дигт күрәд уга бичкдүдин зөв харслһн» гидг нертә танһчин семинар Элст балһсна шишлнг школ-интернатд болв. Энүнд танһчин министерствин элчнр, олн-әмтнә хуралын депутатнр орлцв.

Яшалтинск района Баһ Тугтн селәнә улсин хамгин хурц төрнь —уудг усар тетклһнә төр хамгин ик зовлнг болжана. Селәнә боодгин өөр хойр худг бәәнә.

Элст балһснд Сталинградск дәәлдәнә далн жилин өөнд нерәдгдсн тавн дуунад түрүн гүүлһн болв. Энүнд орлцачнр хотл балсһна цутхлнг талвнгас экләд гүүһәд, Иньглт паркд бәәх цергчнрин бумбин өөр марһа төгсәв.

Сталинградск дәәлдәнә далн жилин ончта өөнд нерәдгдсн байр Волгоград балһснд болв. Төрскән харсгч дәәнә йовудт энд болсн дәәлдән хамгин ик болн сүркә дәәлдән болв. Советск цергин кесг салдснр әмнәсн хаһцв.

Энүнә үүдәлт хамьмг улсин болн Әрәсән туужла өөрхн залһлдата. Хальмг танһчин олн-әмтнә шүлгч Владимир Нуров далн тавн жилин өөнән темдглжәнә. Эн өдрмүдт мана танһчд шүлгчин өөнд нерәдгдсн байрин керг-үүлдврмүд болжана.

Эндр танһчин эрдм-сурһулин, сойлын болн номин министерствин медлд үүлджәх олна хүүвин түрүн сүүр болв. Энүнд мана танһчин өдгә цагин хамгин хурц төрәр хальмгин сурһульчнриг учебникүдәр тетклһнә төрәр күүндвр кегдв.

Танһчин әмтнд өдр-сө уга эмчнр, электрикүд, Калмгазин көдләчнр, полиц болн МЧС нөкд болх. Ода Хальмгин райодт болн Элст балһснд диспетчерск церглтин көдләчнр олн улсин зәнгиг телефоһар бичж авчана.

Апрелин нег шин күртл Элст балһсна перинатальн цутхлнгин герин капитальн ясврин көдлмш төгсхмн. Эндр өдрт нааран йовулгдсн мөнгнәс жирн тавн процентнь олзлгдв.

Эндр өдрәс авн Әрәсән пенсь өсжәнә. Күч-көлснә пенсин даатхлһна әнг болн инвалидмудын болн асрул кежәсн улсан геесн өрк-бүлмүдини пенсь долан шаху процентд икдхмн.

Эндр Амр Санана нертә келн-улсин библиотект Әрәсән ЗАГС-ин йирн тавн жилин өөнд нерәдгдсн байрин хург болв. ЗАГС-ин органмуд бүрдәгдснәс авн олн ведомствсин медлд оржала.

“Во имя Отечества”. Баһ наста шүлгчнрин болн бичәчнрин үүдәврмүдин иим нертә хуранһун түрүн үзүлвр болв. Энүнд балһсна марһана дииләчнрин болн призермудын көдлмш орв. Ут-тоодан шин дегтрин тәвн экземпляр барлгдв.