Яшалтинск района Баһ Тугтн селәнә улс уудг усн уга түржәнә
Яшалтинск района Баһ Тугтн селәнә улсин хамгин хурц төрнь —уудг усар тетклһнә төр хамгин ик зовлнг болжана. Селәнә боодгин өөр хойр худг бәәнә. Эмчнрин селвг тоод авлго, эдн эндәс ус авч уужана. Эннь усна ор һанцхн булг болжана.
Нина Егорова эн һазрт төрж боссмн. Энүнә тодлсар, урднь селән цевр-цер, уудг уста бәәсмн. Ода болхла Баһ Тугтнд бәәдл дегд му, ус алтнла әдл үнтә. Ода уудг усна чинр әмтн оньган өгчәхш. Эврән уудг ус болн герин эдл-аху төлә хулджавчана. Дөврн кубическ метр усн ода һурвн зун тәвн арслнг күрчәнә. Зунын кемд ус кесг холванд икәр олзлгдна.
Гертән өскжәх шовудт, така, нуһсн болн һалудт усн күртхш. Кемр хур-цасн орхла невчк амр болна. Мана үүдәгч баг ирсн өдр энд сән хур орв.
Людмила Молокопой келсәр, ус хулдж авхин төлә дала мөнгн һарна. Талдан хот-хоолд иим ик мөнгн һархш. Һурвн үрән өскжәнә, отхн күүкнь һурвн наста. Хувц-хунран долан хонгт зуг нег дәкж уһана. Людмила Молокопой келсәр, бичкдүд гемнх гиһәд, уудг ус магазинд хулдж авчана.
Арвн жилдән Баһ Тугтн селәнә әмтн уудг усн угаһар түржәнә. Танһчин правительствин ахлач Игорь Зотовла болсн харһлтд бәәрн улс эврәннь зовлнгарн хувалцв. Кезә эднә гермүдт ус ирхин тускар премьерас хәрү күләв. Премьер-министр Игорь Зотовин келсәр, эн хурц төр мана бүртклһнд бәәнә. Федеральн программар усна сурвлжн тосхгдх, тиигхлә сән чинртә усн Элст болн уһврн районд ирх. Селәнд усна сурвлж тахин төлә мөнгн кергтә. Усна боодг малтх төр тәвгджәнә. Федералн мөнг олзлж болшго. Иим мөнгн танһчин бюджетас ирх зөвтә.
Усар тетклһнә обьектин проектн-сметн документац хойр зун далн минһн арслнг күрв. Баһ Тугтна СМО-н администрацин ахлач Юрий Надеевин келсәр, эн документациг танһчин селәнә эдл-ахун министерствд өгч. Болв обьект федеральн программд эс орснас көлтә, усна шин сурвлж тосхдг арһ уга болв. Хөөннь энүнә төсвиг хойр дәкж сольх кергтә болв. Давсн жилин үнлә ирлцүлгдв, энүнәс көлтә жирн минһн немр арслнг кергтә болв. СМО-н администрацин ахлач Юрий Надеевин келсәр, селәнә күүкд күн Әрәсән президентин администрацин толһач Володинла күүндж. Эн обьект федеральн шишлнг программд орв гиж келж. Эн жил күртл селәнә делгрлтин программар мөнг йилһж өгх зөвтә.
Усн ирх гиж тер видеоконференцин хөөн бәәрн әмтн нәәлжәлә. Надеевин келсәр, региональн министерствд обьект бәрхин төлә внебюджетн мөнг олж авх даалһвр өггдлә. Селәнә әмтн байрлад мөнг цуглулв. Зәрм әмтн хошаһад минһн арслнг өгв, зәрмнь һурваһад минһ өгч. Ода усна суврлжн тосхгджахш, әмтн му чинртә ус уужана. Тегәд эврәннь орулж өгсн мөнгнә тускар бәәрн әмтн соньмсжана. Әмтнә мөнг хәрү түгәж өгх даалһвр селәнә администрацин ахлачд премьер Игорь Зотов өгв.
Харһлт зөвәр зүткәтә бәәдл болв. Селәнә улсин тоолврар, хургт хоосн үг келлго, эднә кеслг үгиг һардачнр сонсад, эдниг үүмүлжәх төриг хаһлх зөвтә. Эднә хурц төр эрк биш хаһлгдх гиж правительсвтин ахлач селәнә улсиг иткүлв. Премьер Игорь Зотовин келсәр, баһ тугтн селәг усар тетклһнә төлә хөрн негн шаху сай арслнг кергтә. Эннь танһчин хазнас өгх мөнгн. Эн жил бкүлднь өгх арһ уга, эн жил өрәлнь зөвтә. Иргч жилд усна төр хаһлгдх.
Ээнән Ольга, Очра Сергей
