Эндр һазр икәр мөстәд, дегд хальтрата болв. Сөөһәр аһарин кемжән киитрәд, һазр мөсәр бүркгдв. Тегәд әмтн һаза ик болһамжтаһар йовжана. Эмчнр шавтсн улст дөн күргхдән белн бәәнә.

Ода Хальмг танһчин баһ наста экнр үрнь һурвн жил күртл асрмжин дөнцл мөнг авх.

Эндр Әәдрхн балһснд Хальмг танһчар болн Астраханск областяр Әрәсән ФСБ-н пограничн заллтын ахлач Вячеслав Бирюков пресс-конференц кев. Энүнд давсн жилин көдлмшин аш диглгдв.

Негдгч тойгта Лаганск школд дула өгдг автономн систем углж тәвлһнә төлә нег сай арслнг йилһж өггдв. Сурһулин заведеня һардврин тоолврар, ода түлән әрвнәр олзлгджана, дула өглһнә мөнгн чигн баһрв.

Эндр танһчин правительствин дарани сүүр болв. Энүнд зурһан төр хәләгдв. Тер тоод һол төр болж эрдм-сурһулин федеральн государственн кемжәнд орлһна төлә муниципальн эрдм-сурһулин учрежденьс белдвр келһнә төрәр тодрха күүндвр кегдв.

Төрскн келәр гер болһнд болн өрк-бүл болһнд келх зөвтә. Иим нертә төгрг ширән сүүр багшнр бичкдүдин эк-эцкнрин төлә бүрдәв. Бичкн көвүд-күүкд хальмг келән дуран өгч дасх зөвтә.

Өнгәр приватизац келһнә болзг төгстл нег сар үлдв.

Алвна болн алвна биш ору икдүлһнә төрәр үүлджәх комиссь танһчин премьер-министр Игорь Зотовин седвәрәр тогтагдв. Дарани сүүриг Зотов эврән һардв. Иим сүүр дару-дарунь болх гиж шиидгдлә.

Лаганск района бәәрн әмтн уудг усн уга үлдх әәмшг бәәнә. Энүнә төлә цаглань электрокүчнә мөнгн федеральн бюджетас йилһж өггдсн уга. Тегәд насосн станцс көдлжәхш.

Давсн жилд һан-халунас көлтә һаруд унсн арвн һурвн регионд Әрәсән селәнә эдл-ахун министерств дөнцл мөнг йилһж өгв. Тер тоод Хальмг танһч орв.

Эндр танһчин түрүн арвн долан күүнд Хальмг танһчин күч-көлснә ветерана иткүлин цаас бәүрлж өггдв. Хальмг танһчин толһачин седхрәр батлж авсн шин закан эн жилин январин нег шинәс авн үүлдврт орв.

Йирн тавдгч жилд оруһин уснас көлтә бәәдг гер уга үлдсн әмтнд гермүд эдлврт орулжана. Ода иим зурһан герин тосхлт төгсжәнә. Эн өдрмүдт тосхачнр шалдарин көдлмш күцәжәнә.

Февралин нег шинәс авн күч-көлснә пенсин даатхлһна әнг долан шаху процентд икдх. Күч-көлснә болн социальн харслтын министерствин зәнглсәр, инвалидмудын болн өрк-бүлән тежәсн улсан геесн әмтнә пенсь бас өсх.

Дигтә далн жил хооран Хальмг танһч немшин цергәс сулдхгдсмн. Энүнд зун арвдгч салу Хальмгин мөрнә дивизь орлцсна тускар мана танһчин межә һатц бәәх улс сәәнәр меднә.

Дәкәд нег ончта өөн өөрдж йовна. Дигтә далн жил хооран Сталинградск дәәлдән төгсв. Эндр Хальмг танһчин толһач Алексей Орлов дәәлдәнә орлцачнрла харһлт кев.