Насни дигт күрәд уга бичкдүдин зөв харслһна төрәр семинар болв
«Насни дигт күрәд уга бичкдүдин зөв харслһн» гидг нертә танһчин семинар Элст балһсна шишлнг школ-интернатд болв. Энүнд танһчин министерствин элчнр, олн-әмтнә хуралын депутатнр орлцв.
Нег минһн найн зурһан арвн нәәмн нас күрәд уга өнчн болн эк-эцкин хәләвр уга үлдсн бичкдүд танчһин тоод бичгдж авгдв. Тер тоод асрмжд бәәх дөрвн зун тәвн йисн күн, көвүшлж авсн һурвн зун йирн хойр көвүн-күүкн, государственн теткврт бәәх зун дөчн йисн бчикдүд сурһуль дасжана. Энүнә тускар министерствсин болн ведомствсин элчнр орлцата семинарт зәнглв. Давсн жилд асрмжин органмуд йирн нәәмн эк-эцк уга үлдсн бичкдүдиг илткв, эднсә найн хойр процентнь көвүшлж авгдв. Иим көвүд-күүкдт танһчин бюджетас мөнгн йилһж өггджәнә.
Давсн жилин январин нег шинсә авн эн халхар өрн уга гиж эрдм-сурһулин министрин дарук Раиса Дякиева темдглв. Өнчн бичкдүдиг көвүшлж авсн өрк-бүлмүдт ода мана танһчд арвн һурвн минһн долан зун һучн йисн арслнг өггднә. Танһчин эрдм-сурһулин, сойлын болн номин министрин дарук Раиса Дякиеван келсәр, давсн жилин чилгчәр бәәдг гер уга нег минһн зун һучн зурһан бичкдүд билә. Эн тоод хөрн һуврн наснас ах баһчуд орв. Нидн жил иим бичкдүд герин зөв авсмн. Ода һурвн зун тәвн һурвн күн гер авх зарһин шиидвр авла.
Семинарин йовудт “России важен каждын ребенок” нертә төсв йосн кевәр секгдв. Хальмгин олн-әмтнә хуралын ахлачин дарук Хонһр Эльбиковин келсәр, регионмудт эн туст көдлмшч багмуд бүрдәгдх. Энүнә ханьд йосна элчнр, асрмжин органмудын көдләчнр, бичкдүдиг көдвүшлж авсн эк-эцкнр орх. Иим кеәвр өрк-бүлмүдәс чик зәнг орж ирх. Эн халхар тогтсн бәәдлиг чикәр үнлж болх, кергтә шиидвр батлж авч болжана.
Хуралын ахлачин дарук Хонһр Эльбиковин келсәр, ода партин төсв экләд күцәгдх. Эннь мана танһчин программла әдл Өнчн бичкдүд уга Хальмг танһч гидг нертә болх. Бичкдүдиг көвүшлж авх эк-эцкнрин медицинск шинжлтын болзг һурвн сарас зурһан сар күртл үүлдвртә болх. Иим шинжлт өнгәр өггдх зөвтә.
Тер мет семинарт Хальмгин университетин ректор Бадм Салаев доклад кев. Иим категорин баһчудт немр сурһуль бүрдәгднә. Эк-эцк уга үлдсн көвүд-күүкдт федеральн бюджетас сар болһн нәәмн дундур минһн арслнг ирнә. Дәкәд болхла квартал болһн дегтрмүд болн канцелярск эд-тавр хулдж авхин төлә тавн минһн арслнг өөгджәнә. Тер мет дөрвн сар болад университет хойр минһн арслнг йилһж өгчәнә. Ректор Бадм Салаевин келсәр, иим баһчуд деед сурһульта болх зөвтә. Давсн жилин январин нег шинд иим баһчудас зуг дөчн нәәмн процентнь сурһулян сәәнәр дасжала.
“России важен каждый ребенок” нертә төсв олз-туста болхнь лавта. Жирлһин хаалһин эклцд күнд-түрү бәәдлд туссн көвүд-күүкдт дөн болх кергтә. Эн халхар көдлжәх әмтн бичкдүд болһн нөкд болх зөвтә.
Ээнән Делгр, Хавтхна Анатолий
