Күч-көлснә инспекц давсн жилин көдлмшин аш диглв

Эндр хальмг танһчин күч-көлснә государтсвенн инспекц давсн жилин көдлмшин аш диглв. Зака эвдсн хамгин олн йовдл күч-көлснә бооцана, жалв өглһнә болн күч-көлснә харлһна туст илткгдв. Ведомствин һардач Вера Оргдаеван келсәр, күч-көлснә закана неквр эвдсн улсин тускар хойр зун тәвн һурвн административн засгла харһулх цаасн бичгдв. Иим йовдл нурһлж хулд-гүүлгәнә предприятьмудт, эрдм-сурһулин болн эрүл-менд харлһна учрежденьст илткгдж. Жалвин хамгин ик өрн Городовиковск водоканалд тогтв. Ода эн предприять банкрот гиж тоолгдв. Оргдаеван тоолврар, предприятьмудын һардачнр көдлмшч ормин аттестац кехдән дурлхш. Ода предприятьмудын һардачнр болн көдләчнр зөвән сәәәнр меддг болв гиж эндрк хургт келгдв. Өдгә цагт эмтн күч-көлснә туск заканла танблдв. Энүнд күч-көлснә инспекцд орж ирсн эрлһн ил герч болжана. Иим хойр зун дөчн долан эрлһнәс зун тәвн дөрвн эрлһн чик гиж шиидгдв.