Апрелин нег шинд Элстин төрлһнә герт капитальн ясвр төгсх
Апрелин нег шин күртл Элст балһсна перинатальн цутхлнгин герин капитальн ясврин көдлмш төгсхмн. Эндр өдрт нааран йовулгдсн мөнгнәс жирн тавн процентнь олзлгдв. Давсн жилин октярб сард эклсн капитальн ясвр эрүл-менд харлһна халх шинрүлһнә программар кегджәнә.
Ода Элстин төрлһнә герин тавн давхртнь ясврин көдлмш кегджәнә. Энд күцәгдх цуг һол көдлмш төгсж йовна, тер тоод коммунальн залһлда сольлһна, электрокүчнә сунһуг татлһна болн деерк давхрт шалдарин көдлмш төгсхдән өөрхн. Темдглсн болзгт тосхачнр ясврин көдлмшиг төгсәхәр шунжана. Иим болзгт көдлмш күцәхлә, мөнгн цаглань ирх. Ода деерән ясвр темдглсн болзгар кегджәнә. Энүнд учрдг төрмүд дор ормднь хаһлгджана. Перинатальн цутхлнгин ах эмч Тамара Ермошкаеван келсәр, эдл-ахун әнгин ахлач, әнгсин һардачнр, медсестрас, акушеркс цугтан ирәд селвгүд өгнә. Альд ямаран оборудовань тәвхин, электрокүчнә сунһуг яһж татхин болн талдан чигн селвг өгчәнә.
Энд күцәгджәх ясврин көдлмшиг танһчин правительств чанһ бүртклһнд авла. Хальмгин правительствин ахлачин дарук Лариса Васильева көдлмшин йовудыг бүрткж хәләв. Ода ясврин көдлдмш темдглсн зураһар кегджәнә гиж илткгдв. Ода нааран ирнс мөнгнә жирн тавн процентнь олзлгдв. Ут-тоодан эрүл-менд харлһна халх шинрүлһнә программар эн обьектин капитальн ясврт найн дөрвн сай арслнг йилһж өггдв. Вице-премьер Лариса Васильеван келсәр, правительствин болн эрүл-мендин министерствин халхас чанһ бүртклһн кегджәнә. Ясврин көдлмш сән чинртәһәр темдглсг болзгт кегдх зөвтә. Төрлһнә гер секхинь олн улс күлжәнә. Ода мана танһчд нилх төрлһнә тө өсжәнә. Шинрүлгдсн герт саата күүкд улст цуг кергтә дөн күрггдх. Нилх сән таалд төрх.
Перинатальн цутхлнгин ик герт бәәсн әнгс ясвр кежәх цагт хам-хоша бәәх корпуст орулгдв. Энд нег жил хооран капитальн ясвр кегдсн билә. Энүнд сән ясвр кесн деерән, өдгә цагин некврлә ирлцәтә оборудовань углж тәвгдв. Йилһж өггдсн тәвн сай арслнг мөнгәр УЗИ, искусственн кииһин аппарат, электрофорез, эхоэнцефалограф болн талдан чигн оборудовань хулдж авгдв. Иим шин оборудовань саата күүкд улст сән медицинск дөн күрглһнә сән нилсән күргжәнә. Энүнә тускар нааран ирсн кемд Хальмг танһчин толач Алексей Орлов келсн билә. Алексей Орловин келсәр, ода Хальмг танһчд нилх төрлһнә то ик. Әмтн өнгрдг то баһрв, нилх бичкдүд хорлһна то бас баһрж.
Перинатальн цутхлнгин ах эмчин келсәр, өдгәц агт уутьхн болад, көдлхд күнд болв чигн, цуг саата күүкд улс кергтә дөн авчана. Перинатальн цутхлнгин ах эмч Тамара Ермошкаеван келсәр, хойр минһн арвн негдгч жиллә дүнцүлхлә, нилх төрлһнә то һуврн зун тәвн бчикдүдт өсв. Саата күүкд улст цуг кергтә медицинск дөн күүргджәнә.
Тер саамд медицинск учрежденя герин ясврин көдлмш март сард төгсх гиж тосхачнр иткүлжәнә. Июлин нег шинж перинатальн цутхлнгин коллектив шинрүлгдсн герт орж көдлх.
Чучян Валентина, Бадмаран Владислав
