Волгоград балһснд болсн байрт мана танһчин делегац орлцв
Сталинградск дәәлдәнә далн жилин ончта өөнд нерәдгдсн байр Волгоград балһснд болв. Төрскән харсгч дәәнә йовудт энд болсн дәәлдән хамгин ик болн сүркә дәәлдән болв. Советск цергин кесг салдснр әмнәсн хаһцв. Зуг хортн Ижл һолын өөр зогсагдв. Волгоград балһснд болсн байрт Хальмг танһчин делегац орлцв.
Сталинградск дәәлдәнә болн төрскән харсгч дәәнә ветеранмуд, Әрәсән регионмудын делегацс болн һазадын ордудын элчнр давсн бембә өдр Волгоград балһсна һол талвнгд цуглрв. Нег өдр герой балһснд Сталинград гидг нерн өггдв. Кесг минһн әмтн тер тоод танһчин толһач Алексей Орловин һардврта Хальмгин делегац әмнәсн хаһцсн дәәчнрин талвнгд мөнк зальд цецгүд тәвцхәв. Энүнә хөөн энд цергә парад болв. Далн жил давсн бийнь Сталинград балһсна дәәлдәнд орлцсн улс сөөднь бомбин-самолетмудын ә сонсад сернә. Владимир Атопов дәәнә цагт бичкн бәәж. Дән чилхлә энкр балһсан босхж авла. Волгоград балсһна бәәрн күн Владимир Атоповин келсәр, Сталинград балһснд төрж босж. Дөчн хойрдгч жилд балһсн шатжасинь үзж. Нижний Тагил балһснд танкмуд тосхдг билә.
Диилврин салдснрин тодлсар, энд кегс келн-улсин элчнр ээм-ээмән түшәд, дәәлдсмн, эднәс кесгнь әмнәсн хаһцв. Тегәд чигн Сталинград Әрәсән улсин негдлтин, иньглтин темдг болж мөнкинд үлдх. Минск балһсна ветеранмудын хүүвин ахлач Анатолий Адоньевин келсәр, эн алдр дәәлдән Әрәсән улст, тер тоод Хальмг танһчд болн Беларуссьт ик чинртә йовдл болжана. Тер цагт цугтан хамдан чидлән негдүләд төрскән харсж авла. Советск Союзин цуг келг-улсин иньглт диилвр теткв.
Насн ирәд, эрүл-менднь му болв чигн, кесг ветеранмуд Мамаев курганд бәәх цергә туурмжин залд ирцхәв. Сталинградск дәәлдән нертә туужин мемориальн государственн музей-заповедникд кесг минһн күн ирв. Хальмг танһчин делегацин ханьд күндтә гиичнр болж танһчин ветеранмудын хүүвин ахлач Владимир Овечкин, Сталинградск дәәлдәнә орлцачнр Тимофей Кутыгин болн Николай Кичапов орв.
Төрскән харсгч дәәнә ветеран, Сталинградск дәәлдәнә орлцач Николай Кичаповин келсәр, Сталингардск дәәлдәнә хөөн советск церг дәкж шүүгдсн уга. Энүнә хөөн немшнриг эндәс көөв. Хальмг танһчин толһач Алексей Орловин келсәр, мана ветеран болһнд эн дәәлдән онц чинр зүүжәнә. Эдн төрскән харсгч дәәнд орлцад, Диилвр бәрсмн. Сталинград балһсн туужин нег ончта халх, мана өрк-бүлин туужла залһлдата. Энд аавнь дәәлдәд, шавтсн бәәж. Хальмг танһчин болн цуг Әрәсән улст Сталинградск дәәлдән салдснрин баатр-зөрмг йовдлын темдг болжана.
Онц темдглхд, бәәрн йосна шиидврәр, Сталинградск дәәлдәнә өөнд болн Диилврин өдр майин йиснд Волгоград балһсн герой балһсн Сталинград гиж нерәдгдхмн.
Бевина Мергн, Котина Валерий
