Православн улс ик мацг бәржәнә

Православн шажнд шүтдг улс хойр долан хонгтан ик мацг бәржәнә. Эннь Пасхин сергмжтә байрин өмн өргнд бәрдг хамгин чанһ неквртә мацг болжана. Долан хонг болһн эврә нертә болн чинртә. Энүнд ууж болх хот-хоолын список бәәнә.

Ик мацгин хамгин чанһ неквртә цагнь — түрүн болн сүл долан хонг болна. Дөчн өдртән мацг бәрснә хөөн болн энүнә хөөн долан хонг болад православн улс хамгин һол байран Пасхин байрт белдвр кеж чадх. Элст балһсна улсин зәрмнь иим мацг бәрх керг уга гиж тоолжана.

Эн күүкд күүнә келсәр, мацг бәрх дурн бәәнә, зуг эрүл-менд му болжана. Мацг бәржәхш. Православн шажнд шүтжәхш гиж эн залу келнә. Эн күүкд күүнә келсәр, арһ-чидләрн мацг бәржәнә. Христиан улс болад цугинь күцәхәр зүткжәнә.

Болв шажна зангшалар, мацг бәрсн кемд зуг хот-хол ууж болшго авьяс бәәнә. Хамгин түрүнд эннь оюни халхар бийән цеврлж авлһн болжана. Мацг бәрсн кемд әмтн дотр бәәх хамг му тоотас цеврлгдәд, һарһсн килнц тәвхинь Бурхнас сурна гиж матушка Магдалина келнә. Кесг жилдән эн күүкд күн чонжд хотл-хол кежәнә. Эндр мацгин суп яһж кехин тускар мана үүдәгч багла хувалцв.

Матушка Магдалина келсәр, эндр бор хармар суп кеж. Тосн угаһар, невчкн боднцг, мәнгрс болн улан луувнг тәвж. Дәкәд тутрһ чанв, шикртә идж болх, талдан чигн темстә идж болна.

Казанск кафедральн чонжин гелнгүдин келсәр, мацг бәржәх улс Бурхнас гемән сурад, эгл улсин бәәдл-жирһләс хольжад, ууран дарад, оюни халхар бийән цеврлж авх зөвтә. Энүнд мацгин хот-хол сән дөн болна. Бембә болн нарн өдрмүдт урһмл тоста халун хот ууж болх. Баснг өдр болхла тас хот ууж болшго. Алдр бембә өдр апрелин арвн йиснд хагсу хот-хол уудг авьяс бәәнә.

Хальмгин болн Элстин епархийн сегләтр отец Алексейин келсәр, мацг бәржәх улс шажна авьяс күцәнә. Эн кемд күн болһн олн маань умшна, Евангельд бичгдсн зокал бәрнә. Эврәннь бәәдл-жирһлән Евангельд бичгдсн зокалла ирлцүлхәр зүткнә.

Мацг бәрдг авьяс шажнд сүзглдг улсин эврә шиидвр. Гелнгүдин келсәр, эн туст ямаран чигн даалһвр уга. Тегәд күн болһн мацг бәрхин тускар эврән шиидвр авх зөвтә. Мацг бәрлһнә кемд зуг цөн зокал күцәсн бйинь эмчнрин тоолврар күүнә эрүл-мендин халхар туста болна. Үвл төгсжәх кемд дулан өдрмүдт цогц-махмудан белдж авх кергтә. Тегәд мацуг бәрх улст ода чигн цаг бәәнә. Эн жил Пасхин әрүн байр апрелин хөрнд болх.

Ээнән Делгр, Котина Валерий