Валентина Гаряева ончта өөнән темдглжәнә
Хальмг танһч Хальмгин болн Әрәсән олн-әмтнә артистк Валентина Гаряеван ончта өөнд белдвр кежәнә. Мартын нәәмнд мана нертә дууч далн тавн нас зүүв.
Хальмг танһчин алтн дун. Мана танһчин тег мет у-өргн дун. Эн үгмүдиг Әрәсән олн-әмтнә артистк Валентина Горяеван утскар нерәдж болжана. Энүнә дуулсн енгсн сәәәхн дун зәнг-зах уга тееглә әдл. Валентина Гареяван дун ик күчтә болн экин альхн мет бүлән.
Валентина Гаряева хальмг улсин дууна байн зөөриг олн улст күргж медүлж чадв. Хальмгин дун кесг зун жилмүдт унтршго алтн зөөр мет мана келн-улсиг байрлулж йовсмн. танһчин нертә дууч билгтә болсн деерән, аһу ик көдлмш күцәж, бийдән чанһ неквр тәвж көдлдг артистк болжана. Энүнә үүдәлт хальмгин искусствин туужин бүкл ик халх болв.
Валентина Гаряева олн үртә өрк-бүлд өсж босв. Арвн дөрвн бичкдүдтә өрк-бүлд хара суудг арһ уга бәәсмн. Болв суцл цагтан теегт һарда, Валентина хальмг улсин дуд дуулад, чеежин сергмж авдг билә. Тегәд чигн бичкн цагас авн дассн эрдм ода күртл мартгдад уга. Энүнә дуулсн дун йоста бичкн нааднд хүврнә. Энүнә экнь эврәннь һазртан нертә дууч бәәж. Экәсн халмьг улсин кесг дуд дасж авв. Хөөннь экин дуулж йовсн дууг Валентина эврәннь репертуартан орулв. Ода Вавлентина Нимгировна мана келн-улсин амн үгин зөөр болгс ахр болн хурц йөрәлмүд эврәннь үүдәнә. Эднә өрк-бүлд цуһар цуглрад, цә уухларн эрк биш йөрхл келдг бәәж.
“Бамб цецг” ду-бииһин государственн ансамблин генеральн директор Тюрбя Босхомджиевин келсәр, Валентина Нимгировна бийдән чанһ неквр тәвдг күн. Талдан артистнрт бас иим неквр тәвнә. Олн әмтнлә ни-негн бүлән күр-күүндвр кеж чадна. Талдан улст бүлән үгмүд нерәднә, зәрмдән шоодна. Болв әмтн энүнд өөлхш.
Бичкн цагтан Валентина олн-зүсн эрдм дасхар ухалжасмн. Зуг Бамб цецг ду-бииһин ансамблин директор Яков Абрамис энүнә төрскн Яшкуль селәнд ирәд, шулун шудрмг Валентина күүкиг нертә коллективд орулв. Энд күүкнә билгнь йоста делгрлт авсмн. Өдр болһн репетиц болдг билә, дару-дарунь гастрольд һарч йовх кергтә бәәсмн. Валентина Гаряеван енсгн сәәхн дун малчнрин хошт, теегт, селәдин сойлын гермүдт, Слветск Союзин олн республикст олн әмтнә чикнә хужр ханһадг бәәсмн.
Калмгосфилармоня генеральн директор Аркадий Манджиевин келсәр, мана танһчин дуучнрас түрүн болж Америкд одла. Тенд Валентина Гаряеваг сәәнәр меднә. Энүнә ду сонсхдан дурта. Цуг нарта-делкәд мана келн-улсин сойлла кесг улсиг өөрхн таньлдулв. Иим билгтә улсин нилчәр мана сойлын тускар ик холд әмтн меддг болв.
Ик сцен деер һарч дуулсн күүнд зуг билг ик дөн болшго. Олн улсин седкл авлхин төлә ик көдлмш күцәж, эврәннь сурх зөвтә бәәсмн. Валентина Гаряева ик оньган өгч сурһуль дасв. Эстрадн искусствин цусоюзн үүдәлдтин мастерскойд келн-улсин дууч Ирма Яунзенас ик дамшлт хоршав. Валентина Гаряева кесг дипломар болн талдан чин ачлврмудар ачлгдв. Болв хальмгин дун энүнә жирһлин хаалһд һол орман эзлв.
Калмгосфилармоня генеральн директор Аркадий Манджиевин келсәр, Валентина Нимгировна кесг дуучнрт дөн болж, эдниг келн-улсин ду дуулдг дасхв. Чичрдг, Шарка-барка би энүнә дуулсн дууһас һарч ирв. Зәрм улс энүнә тускар меддго болх. Зуг цаг ирхлә эннь ил медгдх.
Далн тавн нас зүүв чигн, ода күртл Валентина Нимгировна чанһ-чиирг, заглюн. Ончта өөнин байрин керг-үүлдврт белдврин көдлмшиг эврән һарджана. Энүнә өөнд нерәдж Хальмг танһчин райодар кесг сардан байрин керг-үүлдврмүд бүрдәж давулгдх.
Хавтхна Элла, Хавтхна Анатолий
