Әрәсән президентин зәрлгүд күцәлһнә болн Хальмгин дааврта ведомствсин үүлдвр шинжлһнә төрмүд правительствин көдлмшч комиссин һол оньгт авгдв. Комиссин гешүд һучн йисн төрәр күүндвр кех зөвтә.

Эндр Элст балһснд көдлмшч комиссин сүүр болв. Энүнд Әрәсән президентин зәрм зәрлгүд күцәлһнә ашин болн эн халхар бәрсн күцәмжин тускар тодрха күүндвр болв.

Күнд бәәдл тогстн Украинд Хальмг танһч нөкд болх. Эндр шишлнг комиссин түрүн сүүрт дөн болхин туск керг-үүлдврмүдин тускар күүндвр болв. Нөкд болх кергт государственн, муниципальн болн олна организацс орлцж чаджана.

Хальмг танһчд ик кезәнк келн-улсин эрдм — саадгас халһна эрдм сергәж босхгджана. Бәәрн спортсменмүд саадгас халһна марһа бүрдәһәд, хамгин мергнән йилһж авв. Дөрлдән Элстин зурһадгч тойгта эрдмин лицейд болв.

“Хаврин теегин цецгүд”. “Сәәхн күүкд күүнә дүр”. Иим нерәдлһтә хойр һәәхүл Пальмовин нертә келн-улсин музейд секгдв. Шин һәәхүлмүд Мартын нәәмнд — күүкд улсин нарта-делкән сән өдрт нерәдгджәнә.

Пенсионн даатхлһна мөнг орулж өглһнә өрн зун далн сай арслнгд күрв. Ода танһчин нәәмн зун тәвн предпряить-организацс өрнд унсн бәәнә. Эднә тоод бюджетн организацс бас йовна.

ЗАГС-д орулж эрлһ орулж өглһнә ормд электронн эв-арһ ирх. Иим туслмж государственн туслмжин региональн порталар дамжулж өггдх. Ода эн программ цаарандан белдж күцәгджәнә.

Сочи балһснд олимпиадын марһас арвн һурвн өдр болжана. Эндр Әрәсән спортсменмүд биатлонд болн цан дошурт диилвр бәрх гиж нәәлжәнә.

Жил болһн Элстин хаалһд ясврин көдлмш кесн бийнь, хотл балһсна хаалһс му бәәдлд тусв. Элст балһсна уульнцар йовад мана үүдәгч баг энүнд ил герч болв.

Эндр Хальмг танһчин правительствин комиссин сүүр болв. Энүг премьер-министр Игорь Зотов һардв. Сүүрт хаалһар әәмшг угаһар йовлһна, хаалһд учрдг зеткртә йовдлмудас әмтн харсж авлһан төрмүдәр тодрха күүндвр болв.

Элст балһснд дәкнәс худл мөнгн илткж авгдв. Худл мөнгн орж ирсн туск зәнг нег банкин специалистас хотл балһсар Әрәсән МВД-н дежурн әнгд орж ирв.

Мана телекомпань Элстин мэрийла хамдан “Теегин айс” нертә хальмг дууна һурвдгч телевизионн фестиваль давулжана. Энүнд хотл балһсна цуг школмуд гилтә орлцжана. “Калмыкия” ГТРК марһана түрүн программ бичж авчана.

Удл уга Хальмг танһчд мах эд-бод кедг дәкәд нег комбинат экләд көдлх. Сарпинск района Уманцево селәнд ик махна комплексин тосхлт төгсжәнә.

Әрәсән цуг деед сурһуль февралин арвн тавн күртл абитуриентр эн жил ямаран шүүвр өгхинь барлв. Эн жил школан төгсжәх көвүд-күүкдин болн эднә эк-эцкнрин төлә му зәнг ирв.

Яшалтинск районд торһн киилгин гем тархалһиг зогсалһна төрәр оперативн штаб бүрдәгдв. Дәкәд нег тодлад келхлә, Ульяновское селәнд хойр күн торһн киилгин гемәр гемтсиг Роспотребнадзорин региональн заллт илкж авсмн.