Цасн хәәлснәс көлтә олн давхрта гермүдт дусал дусжана
Элстин зурһадгч микрорайона олн давхрта гермдүин эздүдиг оржах хавр байрлулжахш. Цасн хәәләд, ораһар дусал дусжана. Эднә патьрмудт цандг тогтв. Эн гермүдт капитальн ясв яһад эс кегдсмб, коммунальн церглт энүнә тускар ю келжәнә.
Эн күүкд күүнә келсәр, дусал дусад, электросунһуг эвдрх әәмшг бәәнә. Энд бичкдүд гүүж наадна, эннь әәмшгтә.
Кинь давхцдг болв чигн, Людмила Ивановна өдрин дуусн көл деерән зогсх кергтә болна. Амрдг цаг күртхш гиж эн келнә. Дусалын усн эрсәр болн ораһар һоожад, патьрт цандг хурв. Ус цуглулж авдг сав күртжәхш гиж пенсионерк зовлнгтаһар келнә.
Людмила Ивановна келсәр, иим чиигтә герт бәәһә бәәж, гемнх әәмшг бәәнә. Кииһән авч болхш.
Энүнлә хам-хоша дәәнә ветеран инвалид Иван Павлов бәәршлжәнә. Энүнә күүкнь Надежда Афанасьева экцән эврәннь герт авч ирх кергтә болв. Болв эцкиг һанцхараһинь үлдәхд әәмшгтә болжана. Генткн ора нурад, шавр унх эс гиж электрокүчнә сунһуг эвдрх әәмшг бәәнә. Тиигхлә зеткртә йовдл учрхнь юмн уга.
Тер мет иим бәәдл зурһадгч микрорайонд бәәх хөрн тавгдгч герин талдан чигн патьрмудт тогтв. Хавр ирәд, цасн хәәлхлә, бәәрн әмтн жил болһн йоста зовлнг үзнә. Нег үлү, иим аюлла ноолда кехд эднд күн дөн болжахш. Залврин компаня һардачнр эднә келсн үгиг оньгтан авчахш. Зуг нег жил хооран залврин компаня көдләчнр ик түрү үзжх герин ора экләд ясв. Энүнә хөөн кесн көдлмшин тускар тооца кев. Болв бәәрн әмтн удан байрлсн уга. Түрүн хур орхла дәкнәс дусал дусв.
Надежда Афанасьева келсәр, балкон деер дусал дусжана. Энгдән усн орв. Иим герт медтә күн яһж бәәхмб? Бәәж чадшго.
Электрокүчнә сунһуг эвдрх гиһәд герин эздүд герл коридорт бас унтрав. Тегәд ода эдн харнһу коридорар цандгар йовж гертә әрә гиж күрчәнә.
Сергей Писаренко келсәр, залврин компаня һардачнр герт оньг өгчәхш. Һурвн жилдән эрл юичжәнә. Ноябрь сард ясвр кев. Зуг хәрү дусал дусжана. Альдаран мөнгн һардгнь медгдхш.
Мана “Вести — Калмыкия” программин журналистнр эн төрәр цәәлһвр авхар Коммунальник нертә залврин компаньд одв. Урднь герин эздүд нааран кесг дәкж ирәд, эврәннь зовлнгин тускар келж өглә. Компаня һардачнрин келсәр, эн герт ясвр кегдәд, бәәдл ясурлх зура бәәнә. Тенгр дулрахла йисн давхрта герин ораг шинрүлж ясх үгән өгв. Давсн жилин октябрь сард капитальн ясврин ормд бичкн ясвр кеһәд, тооца кеж.
“Коммунальник” залврин компаня ах инженер Юрий Дорджиевин келсәр, дулан болхла эн герт капитальн ясвр кегдх. Ясвр кех цуг материалмуд бәәнә.
Эврәннь халхасн мана журналистнр Элст балһсна зурһадгч микрорайона хөрн тавдгч герин улсин эрлһиг ЖКХ-н халхин олна бүртклһнә цутхлнгд йовулхар шиидв. Дәкәд нег тодлад келхлә. танһчин толһачин седвәрәр бүрдәгдсн олна орган эн жилин январь сарас авн көдлжәнә.
Чучян Валентина, Мятежный Максим
