Селән һазрт медпунктмуд үлдәх кергтә

Танһчин селән болһнд фельдшерск-акушерск пунктмуд хадһлх кергтә. Иим даалвһр танһчин толһач Алексей Орлов өгсн билә. Өда иим пунктмуд яһж көдлжәнә, эднд ямаран дөн күргх кергтә? Эн сурврмудт хәрү авхар мана үүдәгч баг хол селәдт одв. Мана үүдәгч баг Городовиковск района Розенталь поселкд одад ирв. Энд зун зурһан зун күн бәәршлжәнә.

Өрүн эртәс авн селәнә фельдшерск акушерск пунктд олн улс цуглрна. Зәрм әмтн нааран өдр болһн ирнә. Цусна дарлтан медж авхар, кергтә эмнүлһ авхар ирнә. Үлгүрнь, Нина Буджалова нүднә эмчд орхар пунктд ирв. Насн ирәд, нүднә харан му болжана.

Розенталь поселкин фельдшер деед категорин специалист Любовь Демкина энд хөрн жилдән көдләд, бәәрн улсин эрүл-менд харж эмнүлжәнә. Энүнд акушер Елена Бадмаева нөкд болжана. Фельдшерск пунктд көдлжәх специалистнр гемтә улсиг эмнүлсн деерән, саата күүкд улсиг шинжлж хәләжәнә, нилх бичкдүдиг хәләнә, гермүд эргж әмтнд дөн болна, дәәнә ветеранмудт болн инвалидмудт туслмж күргжәнә.Тер мет ФАП-ин көдләчнр гемтә улсиг гертнь одад эмнүлнә.

Розенталь поселкин бәәрн күүкд күн Светлана Бурчугинован келсәр, зәрмдән сө ора эднд жиннүлнә. Эдн кергтә селвг өгнә, оньдин дөн күргхдән белн. Амрлһна өдрмүдт чигн эдн нөкд болна.

Фельдшер Любовь Демкина келсәр, поселкин бәәрн улст цуг кергтә медицинск дөн күрггджәнә. Долан хонгт нег дәкж нааран терапевт болн педиатр ирнә. Эдн гемтә улсиг шишлнг белдсн кабинетмудт шинжлж хәләнә. Тер мет сар болһн хол поселкд Городовиковск района цутхлнг больницас нааран шишлнг эмчнрин бригад ирж көдлнә. Эдн бөдүн улсиг эмчин хәләврт орулна. Тер мет поселкин әмтн цуг кергтә эмәр теткгджәнә. Эннь медицинск даатхлһна халхар күцәгджәнә. Дәкәд болхла энд кергтә медицинск оборудовань бәәнә. Хойр минһн зурһадгч жилд келн-улсин программар фельдшерск акушерск пунктд ЭКГ аппарат ирв. Энүнә дөнгәр бәәрн әмтн гертәсн хол һазрт йовлго зүркнә шинжлт кедг арһ бәәнә. Тер мет кергтә эмнүлһ кех кабинет бәәнә, талдан чигн туслмж күргж болх.

Акушер Елена Бадмаеван келсәр, эмчин саглулгч хәләвр кенә. Саата күүкд улс шишлнг хәләврт бәәнә. Давсн жилд арвн хойр саата күүкд күн хәләврт билә. Арвн хойр нилх төрв. Эн жил март сар күртл зурһан саата күүкд күн ирж эмчин хәләврт бәәнә. Медәтә улсиг гертнь одад хәләнә. Кергтә медицинск дөн күргнә.

Бичкн селәнд цуг кергтә медицинск дөн күрггдсн бийнь энд хора дутжана. Больницин гер һучн жил хооран тосхгдв. Ода гер хуучрад, энүнд капитальн ясвр кех кергтә. Хуучн герин ораһар дусал дусна, герин эсрт шуурха һарв. Болв энд бәәдл сән халхаснь ясрв. Хойр жил хооран фельдшерск акушерск пунктд автономн дула өглһнә систем углж тәвгдв.

Селәнә медицинск пунктд эврә көлгн-күчн бәәнә. Фельдшерск акушерск пункт энд секснә хөөн, бачм чинртә медицинск дөн күргдг машин нааран ирв. Бачм чинртә йовдл учрхла машин сән дөн күргжәнә. Жолач Юрий Гайдамака цаглань кергтә һазрт күрәд, кесг улст дөн болв.

Машина залач Юрий Гайдамака келсәр, хойр долан хонг хооран нег залу күн күнкргән булһлсн бәәж. Энүг ахр болзгт Городовиковск балһснд күргв. Ода эмнүләд һарч ирв.

Танһчин селән болһнд фельдшерск акушерск пункт көдлх зөвтә. Иим даалһвр Хальмг танһчин толһач Алексей Орлов өгв. Ода мана регионд зун фельдшерск-акушерск пункт көдлжәнә. Болв цуг райодт хол селхдин улст медицинск дөн күргхин төлх эннь баһ болжана. Селән һазрт эмнүлин учреждень бәәхлә, селән таршго.

Көкән Герл, Очра Сергей