Хальмгин зарһин приставмуд йисн нелегальн мигрантнриг Әрәсәһәс һарһж йовулв. Энүнә тускар миграционн заллтин барин церглт зәнглжәнә. Эннь Узбекистана, Таджикистана, Сирин болн Украина гражданмуд.

Ээж-аав он-лайн. Иим нерәдлһтә сурһуль Элст балһснд эклв. Энүнд пенсионермуд өнгәр компьютерар көдлх сурһуль дасжана. Ода Әрәсән тәвн дөрвн регионд зун һучн дөрвн компьютерн цәәлврин цутхлнг секгдж үүлджәнә.

Элст балһсна "Буревестник" стадионд эклц эрдмин болн дунд эрдмин шишлнг сурһулин заведеньсин оютнр дунд сурһулин болн дасхлын керг-үүлдвр болв. Энүнд долан команд цергә болн спортивн билг-эрдмән үзүлв.

Эн жилин эклцәс авн Росреесртин заллтд герин зөв темдглж бичлһнә тускар далн минһн эрлһн орж ирв. ведомствин коллегин сүүрт эн жилин йисн сарин көдлмшин аш диглгдв.

Элст балһсна хог-бог асхдг һазрин төр урдк кевәр хурц төр болжана. Ода хотл балһсна цутхлнгд хог-бог шатсна утан күрәд, әмтнд му нилчән хальдажана.

“Инновационная Калмыкия” нерәдлһтә номин баһчудын межрегиональн конференц Хальмгин университетд көдлмшән эклв. Эннь “Умник 201З” нертә программин товчлгч намрин шүүвр болжана.

Танһчин психоневрологическ диспансер эн жил тәвн жилин өөнән темдглв. Энд тәвн жилдән олн-зүсн седклин гемтә улс эмнүлгджәнә, зарһин медицинск шинжлт кегджәнә. Эн жилмүдин эргцд больницин герт капитальн ясвр кегдсн уга.

Эндр Хальмг танһчин государственн күч-көлснә инспекцд журналистнрла пресс-конференц болв. Энүнд эн жилин йисн сарин жалвин өрнә тускар келгдв. Бүртклһнә үүлдврин йовудт хойр зун тәвн нәәмн бүртклһн кегдв.

Эндр өрүн Элст балһснд түүмр шатв. Дөрвдгч микрорайонд бәәх “Най-Ин” ресторана гер шатж.

Эндр Элст балһснд Ленина нертә уульнцд өрүн нәәмн час дөчн тавн минутла дөрвн автомобиль цоклдв. Гиигн “ВАЗ” машин, “Ока”, “Фольксваген” болн “Тойота королла” машид цоклдснас көлтә эдн гармала әдл болв.

Ик Буурла школын багшнр болн сурһульчнр эрдм-сурһулин учрежденя столовд хордж. Эмчнрин кесн шинжлтәр, му чинртә хот-хоолар әмтн хордсн бәәж. Ут-тоодан дөчн дөрвн күн эмчнрәс дөн сурв.

Дула өглһнә кем экләд долан хонг давсн бийнь, Троицкое селәнд ода күртл дулан өггдәд уга. Эндр өдрт тәвн күн бәәх өрк-бүлин обшежитьд дулан ирәд уга.

Әрәсән Президентин даалһврар регионмудт бичкдүдин садмудын төрмүдт онц оньг тусхагдх зөвтә. Хальмг танһчд Алексей Орловин закврар хойр минһн арвн зурһадгч жил күртл дошкольн учрежденьст чеерүд уга кех зура бәәнә.

Селәнә эдл-ахун номин шинжлт кедг хальмгин институт Москва балһснд болсн Алтн намр нертә цугәрәсән агропромышленн һәәхүлин алтн медаляр болн дипломар ачлгдв.

Давсн амрлһна өдрмүдт Элст балһсна хаалһст дөрвн зеткртә йовдл учрв. Тавн күн шавтв. Давсн бембә өдр Ленина нертә уульнцд гиигн машина залач йоһвн кү дәврв.