Хальмгин университетд баһчудын номин конференц болв
“Инновационная Калмыкия” нерәдлһтә номин баһчудын межрегиональн конференц Хальмгин университетд көдлмшән эклв. Эннь “Умник 201З” нертә программин товчлгч намрин шүүвр болжана. Энүнд Волгоград, Әәдрхн, Томск областин болн Хальмг танһчин хойр зун элч орлцжана.
Сарпинск хотхрт сарептск горчс болн тутрһ урһалһна эв-арһ шинрүлһн. Иим төрәр Александр Обгенов шинжлт кев. Аграрн факультетин тавдгч курсын оют эн көдлмшиг бүкл жилдән кев. Энүнә тоолврар, һазрин мелиоративн бәәдл ясрһулһна горчс тәрлһнә эв-арһ кеж һарлһн энүнә шинжлтын һол күцл болв. Энүнә көдлмш Живые системы нертә программд орв. Эннь биотехнологин, иргч медицина халх болжана.
Конференцин орлцач Александр Обгеновин келсәр, тутрһин услврин системд һазрин мелиоративн бәәдл ясрулһна болн Хальмгт тутрһин урһц өөдлүлһнә төлә тутрһ урһалһнд хагсу һазрт урһдг культурмуд урһах кергтә. Иим эв-арһар услвр угаһар сән урһц хураж авч болх.
Товчлгч девснгд ут-тоодан жирн һурвн көдлмш орв. Һучн нәәмн орлцач эврәннь төсвән үзүлв. Тер тоод Виндоус 8 программин ьөлә немр программ белдлһн, мобильн телефона төлә батарей келһн, һазрас ус һарһж авлһна пневосистем бүрдәлһн болн талдан чигн көдлмш. Сүл көдлмшиг тавдгч курсын оют Чингис Кускеев кев. Урдаснь кесн то-дигәр, ус зөөдг машиһар авч и рсн нег кубическ метр усн тавн-зурһан зун арслнг күрнә. Эн эв-арһ олзлад, усиг булгас эс гиж худгас һарһж авхд зуг зун-зун хөрн арслнг һарна. Эннь экономикин халхар олз-туста эв-арһ.
Университетин декан Павел Чимидовин келсәр, баһчудын кесн көдлмш бәдл-жирһлд олз-туста болхд комиссин гешүд онц оньг тусхана.
Павел Чимидовин келсәр, хамгин түрүнд инженер улст баһчудын көдлмш бәәдл-жирһлд олз-туста болх зөвтә. Тер мет эднә көдлмш өвәрц болхла сән болх. Юнгад гихлә энтн инновацинн программ болжана. Тегәд көвүд-күүкд шин зөрүлт болн шиидвр орулж өгхинь күләжәнә.
Инновационн төсвсин марһан һурвн жилдән бүрдәгджәнә. Энүнә дөнгәр номин баһчудыг негдүлә күцл тәвгджәнә. Эн саамд Волгоградск университетин декан Максим Петренко “Система управления роботом через внешнюю среду” төрәр баһчудт мастер-класс үзүлв. Хальмгин университетд баһчудын номин үүлдврт ик оньг өггджәнә.
Универистетин әнгин ахлач Рамазан Файзиевин келсәр, конференцин өмн өргнд шин зөрүлт темдглж авч. Шин зөрүлт делгрүлх зура бәәнә. Мана региона экономикд олз-туста төсв баһчудт өгх санан бәәнә.
Эврәннь шинжлтән цааранднь кехин төлә дииләчнр хойр зун минһн арслнг мөрәһәр ачлгдх. Конференцин орлцачнрин тоолврар, иим керг-үүлдврин һол күцлнь — эврәннь ухан-санаһан бәәдл-жирһлд тохрах арһ учражана.
Ээнән Делгр, Эрнжәнә Эрднь
