Эндр Элст балһснд бөк бәрлдлһнә академьд Иван Габуншина санлд нерәдгдсн вольн янзар бөк бәрлдлһнә арвн негдгч цугәрәсән марһан эклв.
Дөчн хойрдгч жилд немшнр мана танһч эзлсн цагт эврәннь нәәж еврей күүг харсж авсн Хальмг танһчин хойр күүнә нерн Праведники народов мира спискд орулгдх, эднә нерд Иерусалимд стена Плача эрст.
Әрәсән Президентин даалһврар бичкдүдин садмудын төр сәәнәр хаһлжах регионмуд дунд Хальмг танһч йовна. Энүнә тускар дошкольн эрдм-сурһулин халх шинрүлһнә төрмүдәр болсн селвлцәнә йовудт премьер-министр Дмитрий Медведев зәнглв.
Ик-Буурла районд эклц классмудын сурһульчнр йирн һурвдгч жиләс авн хуучн, санитарн кемжәнлә ирлцдго герт сурчана. Энүнд спортивн зал уга, хот уудг хора бас уга болжана.
Эндр Дмитрий Медведевин региональн олна приемнд жилишн-коммунальн эдл-ахун төрмүдәр танһчин хөрн күүнә сурврмудт хәрү өггдв. Энүнд ЖКХ-н болн энергетикин министерствин тарифмудын региональн церглтин болн олн-әмтнә хуралын депутатнр көдлв.
Элст балһсна медәтнрин гер-интернатд һуврн хүрм болв. Энд көгшдүд талдан улсла әдл нег-негән дурлад, өрк-бүлән тогтана. Насн дииләд ирв чигн, зурһан күн өрк-бүлән тогтахар шиидв.
Олимпийск һал тосж авлһнд белдвр кегджәнә. Элст балһсн Олимпийск эстафет ирх зун хөрдгч балһсн болжана. Хальмг танһчин спортын, туризмин болн баһчудын политикин министерств волонтермудын марһа зарлжана.
Эндр “Народный участковый” марһана региональн девснгин дииләч медгдх. Энүнд танһчин райодас болн Элст балһснас арвн нәәмн участкин полицин көдләчнр орлцв. Дууһан өглһн интернетын дөнгәр кегдв.
Дәкнәс худл мөнгн илткгдв. Эннь долан хонгт хойрдгч иим йовдл балж һарчана. Эн саамд Элст балһсна аптекин көдләч полицд эрлһ орулж өгв. Энүнә келсәр, тавн минһн худл цаасн мөнг илткв.
Хойр минһн арвн зурһадгч жилин январин нег шин күртл бичкдүдин садмудт чеерүд уга болх зөвтә гиж Әрәсән правительствин ахлач Дмитрий Медведев тоолжана. Дошкольн учрежденьс федеральн мөнгәр тосхгдх.
Өдгә цагин некврлә ирлцәтә эв-арһин медицинск дөн күрглһнә программар гүлгн гем эмнүлһнә төрмүд хәләгдв. Эндр эн төрмүдәр Элст балһснд нарта-делкән конференц болв.
Олимпийск һал давж һарх Әрәсән цуг субьектмудын һурвн минһн балһсд-селәд дунд Элст балһсн бас йовна. Эстафет Москва балһснд октябрин доланд эклв. Олимпиадын туужд Әрәсән эстафет хамгин ут болх.
Көтчнрә районд махна шин комбинат иргч хойр минһн арвн дөрвдгч жилд көдлмшән эклх. Банкин болн инвестиционн компаня хамцу тосхлт темдглсн зураһар күцәгджәнә.
Эн жил хальмг улсиг күчәр Сиврт нүүлһснә далн жилин һашута өөн күцжәнә. Эн өөнд нерәдгдсн керг-үүлдврмүд танһчин цуг райодт болжана.
Дула өглһнә кем эклсн бийнь Приютненск района социальн зәрм обьектмудт ода күртл дулан өггдәд уга.