Лаганск районд бичкдүдин садмудт немр орм секгджәнә
Әрәсән Президентин даалһврар регионмудт бичкдүдин садмудын төрмүдт онц оньг тусхагдх зөвтә. Хальмг танһчд Алексей Орловин закврар хойр минһн арвн зурһадгч жил күртл дошкольн учрежденьст чеерүд уга кех зура бәәнә. Эн туст Лаганск районд бәәдл ясржана. Энд бичкдүдин садмудт немр багмуд секгджәнә. Дошкольн учрежденьст дула өглһнә автономн систем углж тәвгджәнә.
Эн жил түрүн болж “Дюймовочка” бичкдүдин садт хойр багд көвүд-күүкдиг орулж авв. Немр багд нурһлж һурвн-дөрвн наста бичкдүд оржана. Эднә төлә садын герт бәәх хора балджәнә. Ясврин көдлмш төгсж йвона, хораст цуг кергтхә мебель болн оборудовань бәәнә. Энүнә шин мебель болн өлг-эд хулдж авгдв. Садын һардач Елена Музаеван келсәр, ода дала ик көдлмш үлдсн уга. Санузелын ясвр кегдхлә, бичкдүдиг шинрүлгдсн хораст орулж болх.
Сурһмжлач Занда Наранован келсәр, удл уга шин багд нүүж орхин тускар көвүд-күүкдт келжәнә. Шин орн, шкафмуд, суудл бәәх.
Эн жилин сурһулин жиләс көдвү-күүдлә логопедмуд көдлх. Энүнә төлә эдн шишлнг сурһуль дасв. Тегәд чигн бичкдүдин садт ах наста көвүд-күүкдәс дәкәд нег логопедическ баг бүрдәхәр шиидв. Иим кевәр эк-эцкнриг үүмүлжәсн төр хаһлгджана.
Бичкдүдин садын һардач Елена Музаеван келсәр, бичкн көвүд-күүкдт келнә билг делгрүлһнә көдлмш сән ашта болх. Иим баг секснд эк-эцкнр байрта бәәнә.
Тер мет “Герл” нертә бичкдүдин садт бас немр баг тогтагдв. Энүнд хйор-һурвн наста хөрн тавн бичкдүдиг орулж авч. Эднә төлә цуг кергтә таал бүрдәгдв. Эн баг хальмг улсин зангшал дасдг баг болх гиж шиидгдв. Хамгин һол төрнь көвүд-күүкд хоорндан хальмг келәр күүндх зөвтә. Дамшлтта багш Ольга Лиджаеван келсәр, эн халхар боомтг болдг юмн уга. Энд хальмг келнә кабинет бәәнә, энүнд методическ литератур болн дөнцл материал бәәнә.
Сурһмжлачнрин тоолврар, дошклльн учрежденьст өдгә цагин наадлһна болн спортивн модульмуд уга болжана. Кергтә оборудовань хулдж авсн цагт эн төрт онц оньг тусхах кергтә. Энүнә төлә мөнгн ирнә. Района эрдм-сурһулин әнгин ахлач Юрий Логаевин келсәр, эрдм-сурһулин халх шинрүлһнә программар дошкольн учрежденьс дөннхин төлә зурһан зун минһн арслнг йилһж өгх зөвтә. Эн мөнгин немр багмуд сексн садмудт йовулх. Ода районд иим дөрвн дошкольн учреждень бәәнә. Эн жилин зураһар садмудт зун көвү-күүкн орх зөвтә.
Лаганск РМО-н эрдм-сурһулин әнгин ахлач Юрий Логаевин келсәр, һурвн наснас авн долан нас күртл бичкдүд цуһар садт орна. Ода зуг хамгин бчикн көвүд-күүкд садт орх чеерүдт зогсжана. Ут-тоодан далн бичкдүд зогсжана.
Ода РМО мөнгиг зуг ясврин көдмшт йилһж өгчәхш. Социальн учрежденьсиг автономн дула өглһнә системд орулһна программа районд күцәгджәнә.
Юрий Логаевин келсәр, эн жил цуг дошкольн учрежденьсиг автономн дула өглһнә системд орулв. Бичкдүдин сад болһнд дала мөнг йилһж өгв. Ут-тоодан зун сай арслнг һарһж өггдв.
Бичкдүдин садмудт немр орм секлһнә региоанльн программ Лаганск райондсәәнәр күцгджәнә гиж келж болх.
Чучян Валентина, Очра Сергей
