Пенсионермуд компьютерар көдлдг эрдм дасжана

Ээж-аав он-лайн. Иим нерәдлһтә сурһуль Элст балһснд эклв. Энүнд пенсионермуд өнгәр компьютерар көдлх сурһуль дасжана. Ода Әрәсән тәвн дөрвн регионд зун һучн дөрвн компьютерн цәәлврин цутхлнг секгдж үүлджәнә.

“Родина” нертә сойлын цутхлнгд медәтә улсин төлә дарани сурһуль байрин бәәдлд секгдв. Пенсионермудыг йөрәхәр танһчин министерствсин-ведомствсин элчнр ирв. Өдгә цагт зәнглһнә эв-арһ ик чинр зүүжәнә гиж үг келсн улс темдглв. Ода компьютермуд, ноутбук болн талдан чигн эв-арһ угаһар бәәж болшго. Пенсионерк Бадма Очирова октябрь сарин эклцәр сурһулин тускар сонсчкад, тер дурнь орхар шиидв. Эн өдриг ик кезәнәс авн күләв.

Күч-көлснә ветеран Бадма Очирован келсәр, энүнә ач көвүнь һазадын орнд көдлжәнә. Ач көвүнь цуг техникиг сәәнәр олзлж чадна. Энүнә ачнр-зеенр хоорндан иим техникин эв-арһар хәрлцә бәржәнә. Мана танһчд, Элстд болжах цуг йовдлмудла таньлдна. Ээжнәсн сәәнәр юн болжахинь меднә. Тегәд эдниг дураһад дасж авх санан орв.

Компьютерн түрүн сурһуль хойр минһн нәәмдгч жилд эклсмн. Тер цагас авн алдр Диилврин байрин өмн өргнд медәтә улсин төлә иим сурһуль бүрдәгднә. Ода болхла иим багмуд хйор сард нег дәкж тогтагдх.

Улст социальн туслмж күрглһнә танһчин цутхлнгин һардач Светлана Роман келсәр, иим сурһуль оньдин болх. Ода арвн күн бичгдв. Эдн хойр долан хонг болад сурһулян төгсәх, энүнә хөөн талдан баг бүрдәгдх. Иим кевәр көдлх зура бәәнә.

Валентина Будеева Улан Кирсин ниицәнд көдлнә. Көдлмштән компьютер олзлх кергтә болна. Түрүн медрл авсн бәәнә. Ода Интернетар көдлх дасж авх кергтә.

Күч-көлснә ветеран Валентина Будееван келсәр, медәтә улст хәрлцән дутжана. Техникин дөнгәр хәрлцә бәрж болх. Күүкнь Москвад бәәнә. Электронн бичг бичж болх, скайпар хәрлцә бәрж болх.

Сурһулин багш Гилян Даржинован келсәр, медәтә улсла көдлхд амр болна. Хойр минһн нәәмдгч жиләс авн зун хөрн пенсионериг компьютерар көдлдг дасхв.

Хальмгин университетин компьютерн сурһулин багш Гилян Даржинован келсәр, иим сурһульд одхдан дурта. Медәтнр техникар икәр соньмсжана. Эдн келсн үг болһниг хавлж авна. Иим улсла көдлхд амр. Багш болда кергтә медрл өгнә, медәтнр болхла авсн медрлән үзүлнә.

Ода сурһуль улст социальн туслмж күрглһнә танһчин цутхлнгд болжана. Эдн күсдундур сардан сурх. Эн жиләс авн иим сурһуль бүкл жилдән болх. Декабрь сард шин баг тогтаж авгдх.

Баира Петрова, Очра Сергей