Элст балһснд түүмр шатв
Эндр өрүн Элст балһснд түүмр шатв. Дөрвдгч микрорайонд бәәх “Най-Ин” ресторана гер шатж. Өрүн зурһан час дөчн тавн минутла МЧС-ин заллтин дежурн әнгд заведеня маначас герин ора шатжана гисн зәнг орж ирв. Һал герин һазадк эрсәс авн деегшән һарв гиж нааран ирсн түүмр унтралһна церглтин көдләчнр илткв. Энүнә хөөн һал деегшләд ораднь күрв. Герин эрсн пластикар кеснәс көлтә түүмр дегд түргн кевәр шатж. Энүнд күнд чинрәр хойрдгч категорь өггдв. Тер мет “Най-Ин” ресторанд һал унтрасна хөөн МЧС-ин көдләчнр “Вам” нертә магазинд орсн һалла ноолдв. Эн магазин ресторанас зун метрт бәәнә. Тенд һал эд-тавр бәәсн складт орж. Тер мет магазина өөр бәәсн машин бас шатв. Машина эзнь Максим Мамаев машиһан дегд икәр шатснь үзв. Машина салон бүклдән һалд авлгдж. Зөв-йосна органмудын урдаснь кесн тааврар, ресторанд күн һал өгсн бәәж. Ода энүнә учрнь илткгджәнә.
