Мөшклһнә комитетд сурһульчнрин эк-эцкнрлә харһлтс болжана
Бичкдүд хамгин харслт уга гражданмудын категорь болжана. Эдниг бөдүн улс харсж, бичкдүдт туслмж күргх зөвтә. Хальмг танһчин мөшклһнә комитетд Элстин сурһульчнрин эк-эцкнрлә харһлтс бүрдәж давулгджана. Иим харһлтс гегәрлгч чинртәһәр бүрдәгджәнә.
Хальмг танһчин мөшклһнә комитетин һардачин дарук Валерий Чуб Элстин сурһульчнрин эк-эцкнрлә харһад күүндхләрн, бичкдүин әәмшг уга бәәлһн мана хамцу үүлдврлә залһлдата. Иим харһлтс насни дигт күрәд уга бичкдүдиг зөв тетклһнә туст ведомсвтин специалистнрин зурһара темдглсн көдлмшин нег әнгнь болжана.
Хальмг танһчар мөшклһнә комитетин һардачин дарук Валерий Чуб келсәр, бичкдүдин әәмшг уга бәәлһн эк-эцкнрин хәләврлә халһлдата. Тер мет бичкдүд болһн вэрән әәмшг уга бәәлһнә ул медрл авх зөвтә. Энүг күцәхлә бичкдүд күнд цагт чик шиидвр авч чадх.
Мөшклһнә комитетд тер мет “Ребенок в опасности” нертә телефоһаа жиннүләд нөкд сурж болх. Энүнд танһчин күн болһн жиннүләд, насни дигт күрәд уга бичкдүдин туст зака эвдсн йовдл белджәсн тускар эс гиж зака эвдсн тускар зәнглж чадх. Хальмг танһчин мөшклһнә комитетин һардачин ах нөкд Лариса Болдыреван келсәр, әмтн жиннүлсн цуг зәнг бичгдж авгдна. Энүгәр ирлцнһү керг-үүлдврмүд күцәгднә.
Иим керг-үүлдврмүд бүрдәж давулдгнь бас учрта. Бичкдүдин туст зака эвдсн йовдлмудын то өсәд йовна.
Танһчин мөшклһнә заллтин һардачин нөкд Евгений Санксаевин келсәр, хойр минһн арсн хойрдгч жилд насни дигт күрәд уга бичкддүин туст хөрн һурвн уголовн керг күцәгдв. Эн жилин йисн сарин эргцд насни дигт күрәд уга бичкдүдин туст дөрвн уголовн керг күцәгдж. Эднәс һурвн зака эвдсн йовдл нег насна авн тавн нас күртл бичкдүдин туст учрв.
Ода көвүд-күүкд өдртән нурһлж школд бәәнә. Тегәд насни дигт күрәд уга бичкдүдт әәмшг уга бәәлһнә сурһуль багшнр зөвтә. Школд сурһуль даслһна көдлмшиг сәәнәр бүрдәсн деерән, көвүд-күүкдиг сәәнәр бүрткж хәләх кергтә. Тер мет бичкн көвүд-күүкд әәмшгтә бәәдлд тусхла бийән яһж бәрхин тускар багшнр келж өгх зөвтә.
Һурвдгч школын директорин дарук Александр Ким келсәр, насни дигт күрәд уга бичкдүдин туст зака эвдсн йовлмудас саглулһна көдлмш оньдин кегджәнә. Иим керг-үүлдвр кергтә. Саглулһна көдлмш кехд жанһрта болна. Зуг багшнрин эс гиж балһсна администрацин күцәжәх көдлмш сурһульчнрт баһ болжана.
Насни дигт күрәд уга бичкдүдин туст зака эвддг йовдлмудас саглулһна төлә эрдм-сурһулин учреждень хөв-йосна органмудла хамцу көдлмш күцәлһн эрк биш кергтә неквр болжана.
Танһчин мөшклһнә заллтин һардач Денис Минина келсәр, насни дигт күрәд уга бичкдүдин туст зака эвдсн йовдлмудас гетлүлһнә төлә күцәх керг-үүлдврмүд дунд энүнә учринь илткж авлһн, цәәлһврин көдлмш күцәлһнә болн олн зәнглһнә эв-арһсла хамцу үүлдвр болжана. Мөшклһнә заллтин белдсн бичкн дегтриг сурһулин заведеньд түгәж өгх.
Мөшклһнә комитетин көдләчнр “Как ребенку не стать жертвой преступления” нертә бичкн дегтрт барлгдв. Энүнд эк-эцкнрт, багшнрт әәмшгтә йовдлмудас саглулһна селвгүд орв. Хамдан чидлән негдүләд көдлхлә, бидн бичкдүдиг әәмшгтә йовдлмудас гетлүлж авч чадхвидн.
Елена Алексенко, Ээнән Делгр, Эрнжәнә Эрдн
