Хог-бог асхдг һазрин төр Элст балһснд хаһлгдх
Элст балһсна хог-бог асхдг һазрин төр урдк кевәр хурц төр болжана. Ода хотл балһсна цутхлнгд хог-бог шатсна утан күрәд, әмтнд му нилчән хальдажана. Дәкәд болхла зака эвдж хог-бог асхдг һазр танһчин райодт чигн олн. Эн төр хаһлхин төлә танһчин правительств хойр минһн арвн дөрвдгч — хойр минһн хөрдгч жил күртл шишлнг программ батлж авгдв.
Эн өдрмүдт Элст балһсна хог-бог асхдг һазрт үвлин кемд белдврин көдлмш кегджәнә. Дулан сүл чилгр өдрмүд олзлад, көдләчнр эргндк аһу цеврлжәнә. Ода нааран орж ирдг хаалһ уга. Специалистнрин келсәр, үвлин кемд цасн-мөстә цагт машид йовхд күнд болна. Энүнә аһу ода арвн гектар тогтажана. Өдр болһн коммнулаьн церглтин машид болн эзнә автомобильмуд нааран хог-бог авч ирж асхна. Хойр минһн доладгч жиләс авн эн предприять мөнгәр теткгджәхш, цуг һаруг шишлнг эдл-аху даажана.
Шишлнг эдл-ахун генеральн директор Владимир Эрендженовин келсәр, эндр өдрт хотл балһсна хог-бог асхдг һазр дүүрнг, энүнд хог-бог асхж болжахш. Хог-бог эд-бод келһнә халхар зөвшәлт батлж авлһна туск правительствин тогтаврин тускар ЖКХ-н сүүрт күүндвр кесн билә. Эн зөвшәлтәр хог-бог асхдг полигон бәрхин төлә һазрин участк йилһж өгх кергтә. Ода тавн гектар һазрин участк йилһж өглһнә туск төр хотл балһсна администрацд болн һазрин министерствд хәләгджәнә.
Роспотребнадзорин заллтин көдләчнрин иткүлсәр, шишлнг полигон ода бәәх хог-бог асхдг һазрас йилһрнә. Тогстн зокалар иим полигон һазрин усн ик дора бәәсн һазрт кегднә. Энүг төгәләд һузр ус цуглулж авдг турвас тәвгднә. Иим полигона йоралд уснас харсдг шишлнг материал углж тәвгднә. Зуг иим көдлмш күцәхд дала мөнгн кергтә болжана. Федеральн закаһар Роспотребнадзорин специалистнр энд зураһар темдглсн бүртклһ һурвн жилд нег дәкж кех зөвтә. Ода Элст балһсна хог-бог асхдг һазрт санитран кемжән күцәгджәхш гиж келж болх.
Хальмг танһчар государственн санитарн ах эмчин дарук Жанһр Санджиевин келсәр, ода бәәх хог-бог асхдг цуг һазрт санитарн некврмүд күцәгджәхш. Хотл балһсна иим һазр дөнч жилдән олзлгджана. Ода шин полигон бәрх неквр тәвгджәнә. Тер мет танһчин төлә промышленн үлдл асхдг һазр бас кергтә. Энүнә тускар танһчин правительств хог-бог эд-бод кедг комплекс бәрхәр зуралв.
Сүл арвн жилд хог-бог асхдг һазрин төр хурц төрт хүврв. Ода Элст балһснд закаһар хог бог асхдг һазр болн зака эвдж хайдг хог-бог һазр дала. Болв аштнь цуг хог-бог Элстин дорд үзгт бәәх һазрт авч ирж асхгдна. Энд дару-дарунь түүмр шатна. Эндәс һардг утан Элст балһсна әмтн бәәдг гермүдт күрнә. Зәрмдән салькн көдлхлә энүнә му үнр хотл балһсна цутхлнгд күрнә. Эн туст танһчин программ яһж күцәгджәхин тускар бидн Хальмгин йиртмжин министерствас цәәлһвр авлавидн.
Танһчин йиртмжин көрнгин болн эргндк аһу харслһна министерствин әнгин ахлачин дарук Евгенйи Пандинован келсәр, ода тавн зхун һучн йисн минһн арслнгар өдгә цагин контейнермуд хулдж авгдв. Зака эвдж хог-бог асхсн һазрт нәәмн зун тәвн тавн минһн арслнга көдлмш кегдв. Тер тоод эргндк аһу цеврлһнә көдлмш бас орв.
Ут-тоодан иим программ күцәхин төлә хойр жува арлснг һарх. Энүг күцәлһнә көдлмш шинкн эклв. Ут-турштан программ нәәмн жилдән күцәгдх. Тегәд хотл балһсан цеврлж авх цаг бәәнә. Эс гиж Хальмгин хотл балһснд экологин халхар йоста аюл болх әәмшг бәәнә.
Батан Санжирма, Очра Сергей
