Баһчуд цергт мордлһнд белдвр кежәнә

Элст балһсна "Буревестник" стадионд эклц эрдмин болн дунд эрдмин шишлнг сурһулин заведеньсин оютнр дунд сурһулин болн дасхлын керг-үүлдвр болв. Энүнд долан команд цергә болн спортивн билг-эрдмән үзүлв. Иим керг-үүлдвр баһчудыт төрскнч сурһмж өгсн деерән, цергт көвүдиг белдхд сән нилчән күргнә.

Автомеханикин эрдм дасжах Тимофей Беркасинов түрүн болж иим керг-үүлдврт орлцжана. Тегәд марһанд тохнята белдвр кев. Энүнә төлә противогаз чикәр өмдсг дасж авв, зергләнд йовдг дамшлтан өөдлүлв, талдан чигн цергт мордсн цагт кергтә эв-арһ дасж авхар шунв.

Элст балһсна зурһадгч тойгта эрдмин лицейин оют Тимофей Беркасиновин келсәр, цергт мордлһнд белдвр кех кергтә. Цугинь ода медж авхла сән болх. Эцкнь болн ахнь цергт цергслн бәәж. Цергт мордхар седжәнә.

Марһана программар көвүд чидлән сөрлһнә, гранат шивлһнә, зергләнд йвлһна, автомат цуглулһна дөрлдәнд орлцв. Көвүд цуг марһаст чидлән агсж дөрлдв. Өгсн даалһвриг түргәр болн чикәр кехәр зүткв.

Иим керг-үүлдврин һол күцлнь — баһчудт төрскнч сурһмж өглһнә, физическ культурар болн спортар соньмслһна төр тәвгджәнә гиж энүнә бүрдәһәчнр келнә.

Хальмг танһчин спортын, туризмин болн баһчудын политикин министерствин ах специалист Очр Шаулиновин келсәр, иим керг-үүлдвр хойрдад бүрдәж давулгджана. Эннь сән зангшалд тохрв. Энүг намрин-хаврин кемд цергт мордсн кемд болна. Энүнә төлә шишлнг программ бәәнә болн дасхл баһчуд күцәнә.

Марһанд арвн тавн — арвн долан наста көвүд орлцв. Эдн нурһлж негдгч — хойрдгч курсын оютнр. Зурһадгч тойгта эрдмин лицейин команд иим керг-үүлдврт хойр жил дарандан орлцжана.

Эн көвүнә келсәр, һурвн сардан белдвр кеж. Цергт эннь кергтә болх. Жирһлин хаалһд бас туслх. Хойрдад иим марһанд дөрлджәнә. Дөрлдән таасгджана. Күн чанһ-чиирг болна гиж эн келва. Эн көвүнә тоолврар, иим керг-үүлдвр болхин тускар сонсчкад, орлцхар шиидв. Иргчдән цергт мордхла эннь олз-туста болх зөвтә.

МЧС-ин курсантр талдан баһчудасм цуг даалһвриг амрар күцәв. Юнгад гихлә иим дамшлтын сурһуль эдн бүкл жилдән дасна.

МЧС-ин кадетск классин курсант Тамерлан Лиджиевин келсәр, эдн харсачин эрдм дасжана. Иим эрдмтә улс чан-чиирг болх зөвтә. Әәмшгтә бәәдлд әмт харсж авх кергтә. Эднд иим дамшлт болн сурһуль өгчәнә.

Иим керг-үүлдврмүдт көвүд цогц-махмудан батрулсн деерән, дорас өсж йовх баһчудын занг батрна, эдн чанһ-чиирг болна. Энүг хәләсн әмтнә тоолврар, эдн салдсин нег өдрин дамшлт хәләж чадв.

Баира Петрова, Бадмаран Владислав