«УМНИК-2011». Хальмгин государственн университет болн баһ предприятьмудыг делгрлт дөн күрглһнә санг октябрь сард бүрдәж давулсн номин инновационн төсвсин марһана ашар долан баһ наста номт призермудын тоод орв.

Эндр Хальмг танһчин олн-әмтнә хуралын һучн һурвдгч сессин сүүр болв.

Сурһульчнрин амрлһна өдрмүдт Элст балһснд танһчин бичкдүдин шатрин түрүн школын директор Константин Эрдниевин санлд нерәдгдсн дөрвн марһан болжана. Шатрчнрин ик зунь иим дөрлдәнә ашт эврәннь разрядан өөдлүлж чадх.

Элст балһснд талдан чигн соньн марһас болв. Зөв-йосна органмудын элчнр хамгин мергнән йилһв. Эн марһан хальмг танһчар УФСБ-н заллтин шишлнг әнгин көдләч Владимир Манджиевин санлд нерәдгдв.

Эндр Элст балһснд селәнә эдл-ахун болн эд-бод кедг промышленностин көдләчнрт нерәдгдсн байрин хург правительствин герин сүүрин залд болв.

Хальмг танһчд Әрәсән Государственн Думин депутатнриг сунһлһна бюллетеньмуд хальмг келәр барлгдх. Энүнә тускар эндр Әрәсән сунһврин цутхлнг комиссь зәнглв.Мана орн-нутгин арвн субьектд бюллетень хойр келәр, тер тоод келн-улсин келәр барлгдхмн.

Хальмгин эмчнр Әәдрхнә эмнүлин учрежденьст дамшлтан өөдлүлжәнә. Иим сурһуль кехин төлә шишлнг программ тогтагдв. Энүнд медрл авсн деерән, дамшлтын кичәлмүд бас болна.

Дагестана, Чечнян болн Хальмг танһчин бөкнр дәкнәс дииләчнрин болн призермудын тоод орв. Элст балһснд танһчин нертә бөк Иван Михайлович Габуншина санлд нерәдгдсн цугәрәсән йисдгч марһан төгсв.

Зарһин приставмуд байрин өдр болв чигн урдк кевәр көдлжәнә. Өртә улсла ноолда кеһәд, мөнг некж авчана, зарһин шиидвр күцәжәнә. Ода Элст балһснд нәәмн зун күн алиментан өгчәхш.

Элст балһсна шин мэр, хотл балһсна депутатнрин хургин ахлач шиидгдв. Эн үүлд Эрднь Шогджиев батлгдв. Иим шиидвр эндр Элстин хургин депутатнрин дарани биш сүүрт батлж авгдв.

Элст балһснд мини-футбольн марһан болв. Энүнд танһчин зөв-йос харлһна органмудын командс дииләчән йилһв. Зүткәтә дөрлдәнә ашт МВД-н команд МЧС-ин футболистнриг 5:0 тооһар дииләд, түрүн орм эзлв.

Хальмг танһчд баһ болн дунд бизнес дөннлһнә муниципальн программс күцәлһнә төлә тавн сай арслнг йилһж өггдх. Эднәс федеральн бюджетас дөрвн сай арслнг ирх, нег сай арслнг танһчин бюджет йилһж өгх.

Бандитмуд бәрж авгдв, бәрәнд авсн улс сулдхгдв. Иим аштаһар Элст балһсна аэропортын аһуд болсн шишлнг сурһуль төгсв. Сурһулин таалар, террористнр йовж йовсн автомобильмудыг хаһад дәврлһ кев.

Сунһврт орлцх партьст цәәлһврин көдлмш кехин төлә өнгәр эфирн цаг өггдх. Эндр Хальмг танһчин сунһлһна комиссьт, Әрәсән цутхлнг комиссла әдл жирв хайлһн өрүн арвн часла эклв.

Эндр Хальмг танһчин правительствин дарани сүүр болв. Энүнд правительствин гешүд тавн төрәр күүндвр кев.