Эн өдрмүдт мана танһчд шүлгч Санһжин Босян ончта өөн темдглгджәнә

Ноябрин зурһанд мана танһчд хальмгин олн-әмтнә бичәч Санһжин Босян ончта өөн темдглгдх. Эн жил билгтә бичәч йирн нас зүүх бәәсмн. Өөнд нерәдгдсн керг-үүлдврмүд танһчин цуг райодт болжана. Аршан селәнд бәәдг Пушкина библиотекин филиалд иим нег керг-үүлдвр болв.

Библиотекин көдләчнр Зинаида Манкурова болн Любовь Оджигаева Аршан селәнә күүкдиг хальмгин бичәч Санһжин Босян үүдәлтлә таньлдулв. Энүнд Бося Бадмаеван дегтрмүдин стенд тәвгдв. Бичәч, драматург, орчулач Санһжин Бося эврәннь шүлгүдтән, поэмдан төрскн һазрин, келн-улсин хәрлцәнә тускар бичдг билә. Дәкәд болхла, төрскн келндән хару, Бося Бадмаевна хальмг келнә тускар бас бичлә. Энүнә «Төрскн келн» гидг шүлгиг мана танһчин сурһульч болһн дассн болх.

Санһжин Босян үүдәврмүд орс, англь, немш, испаня, бурятин, литовск болн нань талдан талын келнд орчулсн бәәнә. Бийнь Бося Бадмаевна хам хоша бәәдг ар кавказин бичәчнрин үүдәврмүдиг орчулдг билә.

Эн харһлтд күүкд кесг соньн тоотс бийдән шингәж авв. Керг-үүдврин йовудт дегтрин сангин көдләчнр хальмгин нертә бичәч Санһжин Босян шүлгүд умшад, энүнә жирһлин хаалһин тускар келж өгв. Келхд, сентябрь сард Элст балһсна 15гч тойгта школын багшнр болн библиотекин көдләчнр хальмг бичәчнрин үүдәлтд нерәдгдсн викторин давулв. Энүнд көвүд-күүкд шунмһа кевәр орлцад, медрлән үзүлв.

Иргч амрлһна өдрмүдт Зинаида Манкурова болн Любовь Оджигаева балһсна 15-гч тойгта школын сурһульчнрла Санһжин Босян санлд нерәдгдсн литературн асхн хальмг келәр давулх зурата бәәнә.

Шаран Баира