Элст балһснд танһчин бичкдүдин шатрин марһан болжана
Сурһульчнрин амрлһна өдрмүдт Элст балһснд танһчин бичкдүдин шатрин түрүн школын директор Константин Эрдниевин санлд нерәдгдсн дөрвн марһан болжана. Шатрчнрин ик зунь иим дөрлдәнә ашт эврәннь разрядан өөдлүлж чадх. Тер мет шатрин дөрлдән шинкн экләд нааджах спортсменмүд орлцжана.
Тавн балл шүүж авх санатав, нег сай асрлнг шүүж авх зура бәәнә гиж Эльзята Бадмаева келнә. Эльзата Бадмаева болн Никита Болдырев зуг таваһад наста.Эдн эврәннь насни багд хамгин бичкн. Болв тренермудын келсәр, эдн сән үзмж бәрх зөвтә. Зуг цөн сар хооран эдн шатр наадх экләд дасв. Тер бийнь ода эдн һурвдгч разрядта. Эльзятан эк Саглр Бадмаеван келсәр, түрүн болж күүкән шатрин клубд эн жилин апрель сарин чилгчәр дахулж ирв. Тер цагас авн наадһасан хаяд зуг шатр нааддг болв. Саглр Бадмаеван келсәр, намаг болн эцкән шатр наадхинь сурна.Мадниг оньдин диилнә.
Эн марһанд Эльзят эврәннь разрядан өөдлүләд, хойрдгч разряд авх арһ бәәнә. Ода деерән зуг нег балл хоршав. Хойрдгч разряд авхин төлә тавн балл авх кергтә. Цаарандан дәкәд долан наад кех кергтә. Танһчин бичкдүдин шатрин школын түрүн директор Константин Эрдниевин санлд нерәдгдсн фестивалин программар дөрвн марһан болжана. Тер тоод шинкн экләд нааджах улсин дөрлдән болх. Энүнд далн көвүд-күүкд орлцжана. Иим марһана ашар бичкн шатрчнр чидлән сөрж чадх. Эн өдрмүдт арвн негн хамгин сән шатрчнр намрин амрлһна кемд Сочи балһснд болжах Өмн үзгин федеральн округин марһанд мана танһчин нер харсжана. Тренер Михаил Голося келсәр, мана командын ханьд олн шатрчнр йовж чадх бәәсмн. Харм төрхд, марһанд зуг мөнгтә эк-эцкнрин үрдүд одв. Тренер Михаил Голося келсәр, Сочи балһснд йовхин төлә танһч мөнг йилһж өгсн уга. Бичкдүд эк-эцкнриннь мөнгәр йовв. Ода болжах марһаст болхла бичкн шатрчнр билг-эрдмән үзүлж чадх. Мөнгәр тетклһн хурц төрт хүврв гиж тренер келнә.
Шатрин школын һол күцлнь — шин чемпионмудыг өкх кергтә гиж тренер Михаил Голося келнә. Болв энүнә төлә кергтә таал болн мөнгн кергтә болжана. Тер бийнь шатрт дурта бичкдүдин то жил ирвәс өсәд йовна.
Татьяна Зубцова, Хулхачин Николай
