Дагестана, Чечнян болн Хальмг танһчин бөкнр дәкнәс дииләчнрин болн призермудын тоод орв
Дагестана, Чечнян болн Хальмг танһчин бөкнр дәкнәс дииләчнрин болн призермудын тоод орв. Элст балһснд танһчин нертә бөк Иван Михайлович Габуншина санлд нерәдгдсн цугәрәсән йисдгч марһан төгсв. Энүнд Әрәсән хамгин сән гисн бөкнр орлцад, дииләчән йилһв.
Давсн амрлһна өдрмүдт танһчин бөк бәрлдлһнә академьд Әрәсән регионмудас ирсн уйн наста бөкнр дунд марһан болв. Энүнд Ар Кавказин болн Өмн үзгин федеральн округсин нәәмн регионас хойр зун далн спортсменмүд дөрлдв. Дөрлдән арвн һурвн чиннүрин категорьт дииләчән йилһв. Түрүн өдр болсн марһана ашт сән үзмж Хальмгин элчнр Александр Менкенов, Николай Нохаев болн Алдр Харцызов бәрв. Хальмгин бөкнр яһж дөрлдснә тускар Саша Менкенов иигж келв. Хальмгин уйн наста бөк Саша Менкеновин келсәр, Дагестана бөкнрлә ноолдад, цугтаднь диилвр бәрв. Дагестана спортсмена келсәр, нооладһан шүүж чадсн уга, һурвдгч әнгд муурв. Хойр балл авч чадсн уга. Тегәд шүүгдв.
Тогтсн авьясар Дагестана, Хальмг танһчин болн Чечнян бөкнр хамгин сән күцәмж бәрнә. Әрәсән регионмудт бичкдүдин спортд ямаран оньг тусхагджахин тускар тренермуд хоорндан күүндәд, ухан-тоолврарн хувалцв. Әрәсән спортын министр Виталий Муткон даалһврар, спортын халхд сән үзмж бәрсн регионмудт немр мөнгн йилһж өггдх зөвтә. Вольн янзар бөк бәрлдлһнә халхар регионмудын элчнр сән үзмж бәрхлә, эднд государств дөн болну аль угай? Энүнә тускар Чеченск республикин элч, нарта-делкән классин зарһч Асланбек Дудулаевин келсәр, марһан болһнд мана федерац мөнг йилһж өгнә. Иргс жилд арвн хойр сай арслнг йилһж өгх зурата.
Харм төрхд, Ростовск областин эчлнр Элст балһснд болсн марһанд сән үзмж бәрж чадсн уга. Энүнә учрин тускар Константиновск балһсна командын тренер Тимур Доевин келсәр, багшнр болн тренермудт хаалһин мөнг кезә өгсинь мартж. Эврәннь мөнгәр йовнавидн. Бичкдүдин төлә спортын залмуд бәрх гиж телевизорар келнә. Болв мана Роствоск областьд иим залмуд дегд хуучн
Марһана ах зарһч Валерий Убушаев эн төрәр иим тоолврта бәәнә. Энүнә темдглсәр, мана көвүд сәәнәр ноолддг болв. Дагестанас, Чечняһас болн Аланяс ирсн улст ик ханлтан өргжәнәвидн. Эдн маднд сән дамшлтарн хувалцна. Мана көвүдт энн туста болна. Мана бөкнр призермудын тоод оржана.
Бөк бәрлдлһнә халхар хаһлх төрмүд олн бәәв чигн, мана орн-нутгин спортын зангшал хадһлгдж, баһчуд цаарандан делгрүлх зөвтә. Нарта-делкән категорин зарһч, Әрәсән спортивн бөк бәрлдлһнә зарһч Петр Царгасовин келсәр, хальмг танһчд олн-зүсн марһас йир сәәнәр бүрдәгдж давулгдна. Энүнә келсәр, Хальмг танһчд дөрлдәг сәәнәр бүрдәнә. Иим сән бүрдәмжин көдлмш талдан регионмудт уга. Тегәд нааран ирж дөрлдхдән дуртавидн.
Иван Габуншина санлд нерәдгдсн марһана ашар билгтә шин бөкнр йилһрв. Арвн зурһан категорьт диилвр бәрсн улсин нерд бөк бәрлдлһнә федерацин интернет сайтд барлгдв. Онц темдглхд, Хальмгин бөк Саша Менкенов эврәннь чиннүрин категорьт түрүн орм эзлв.
Колдан Наталья, Дукмана Николай
