Элст балһснд Советск Союзин Герой генерал-лейтенант Баснг Городовиковин санлд нерәдгдсн вольн янзар бөк бәрлдлһнә цугәрәсән марһан төгсв. Энүнд диилвр бәсрн бөкнр спортын мастерин цол зүүв.

Целинн района эврә дурар үүлддг зурһан коллектив олн-әмтнә нерән иткүлв. Давсн амрлһна өдрмүдт ансамбльмудын аттестац болв. Артистнр жюрин оньгт болн олн әмтнд хамгин сән концертн программан үзүлв.

Эндр Элст балһснд номт Геннадий Авляев бәәсн дөрвдгч микрорайона дөчн хойрдгч герт мемориальн самбр байрин бәәдлд секгдв. Эн керг-үүлдвр номтын далн тавдгч жилин өөнд нерәдгдв.

Яшкульск районд ут-тоодан дөчн негн олн патьрта гер бәәнә. Эднәс ик зунь одла күртл капитальн ясврт орад уга. Зуг шишлнг программин нилчәр яшкулихн эврәннь гермүдән шинрүлж авх арһ учрв.

Элст балһснд государственн концертн залд Лидия Кулешован концерт болв. Эн өдрмүдт Әрәсән ачта артистк далн тавн жилин өөнән темдглжәнә.

Элст балһсна әмтн дулан нарта өдрмүдт удан байрлсн уга. Сүл өдрмүдт үүлн бүркәд, хур оржана, зөвәр киитрв. Йириндән апрель сард мана танһчд хамгин ке-сәәхн цаг болна.

Хальмг танһчд цаһан алхц гемәс гетлүлһнә төлә бичкдүдт тәрлһн кегджәнә. Ут-тоодан энүнд нег наснас авн долан нас күртл дөврн минһн көвүн-күүкн орлцх.

Эндр Элст балһснд Хальмг танһчин олн-әмтнә хуралын дөчн тавдгч дарани сессин сүүр болв. Түрүләд сессин сүүрт орлцачнр олн-әмтнә хуралын депутат Дамба Буджаловин күцц зөвин туск төр хәләв.

Хальмг танһчд түрүн болж Италин композитор Доменико Доницетти үүдәсн “Рита или пиратский треугольник” нертә опер тәвгдх. Нег әнгтә шог наадна опериг түрүн болж Государственн симфоническ оркестрин болн хорин артистнр үзүлх.

Баһ тетквртә өрк-бүлмүдин көвүд-күүкд болн инвалид бичкдүдин төлә баһчудын организац, эрүл-менд харлһна министерств болн келн-улсин музей буйнч седклин керг-үүлдвр күцәв. Энүнд жирн бичкдүд орлцв.

Элст балһснд эн жил шин бичкдүдин садмуд эдлврт орулгдх. Энүнә төлә дөчн сай арслнг йилһж өггдв. Эннь федеральн хазнас ирсн бюджетн кредитын мөнгн гиж мэрийн һардачнр зәнглв.

Эндр Хальмг танһчин хойр дундур сурһульчнр ЕГЭ-н сөрлһнә шүүвр өгв. Шүүврин көдлмшиг муниципальн кемжәнд шинжлх, эднәс зун һучн процентнь региональн хәләврт орх.

Апрелин хөрнд Хальмг танһчд бамб цецгин фестиваль болх гиж зуралгджана. Энүнә тускар танһчин спортын, туризмин болн баһчудын политикин министерств эндр зәнглв. Фестивалин һол күцлнь — мана танһчд туризм делгрүлһнә төр тәвгджәнә.

“Тюльпанчик” нертә бичкдүдин ансамблин хөрн жилин өөнд нерәдгдсн концерт Элст балһснд болв. Уйн наста артистнр государственн концерн билг-эрдмән үзүлв. Бичкн билгтнр хамгин сән гисн бииһән үзүлв.

Амр Санана нертә келн-улсин библиотект хойр алдр шүлгчнрин Расул Гамзатовин болн Көглтин Даван иньглтд нерәдгдсн үүдәгч асхн болв. Энүнә шүлгләнд дурта әмтн, сурһульчнр болн бичәчнр ирж орлцв.