Яшкульск районд олн патьрта гермүдт капитальн ясвр кегджәнә

Яшкульск районд ут-тоодан дөчн негн олн патьрта гер бәәнә. Эднәс ик зунь одла күртл капитальн ясврт орад уга. Зуг шишлнг программин нилчәр яшкулихн эврәннь гермүдән шинрүлж авх арһ учрв. Капитальн ясвр нертә программар эдн бәәдг гермүдән ясж авв.

Ленина нертә уульнд бәәх олн патьрта гер тәвн доладгч жилд тосгдж. Энүнд бәәх әмтн капитальн ясвриг тенкән уга гидгәр күләв. Энүнд давсн жилд шинрүлһнә көдлмш кегдв. Ода гер тас талдан бәәдл һарв. Энүнә ораһинь шинрүлж, электрокүчнә сунһуг сольв, эргднк аһу кеерүлв. Энүнә төлә нег сай арслнг йилһж өггдв. Иим программ күцәсн авн хойр минһн нәәмдгч жиләс авн Яшкуль селәнә арвн хойр олн патьрта гермүдт капитальн ясвр кегдж. Федеральн бюджетас арвн хойр сай арслнг ирв. Тер мет зурһан минһн арлснг мөнгн танһчин хазнас ирж. Хойр сай арслнг бәәрн бюджет йилһж өгв. Тер мет долан зун далн тавн сай арслнгиг бәәрн эздүд даав. Ода Кануковин нертә уульнцд бәәх дөрвн патьрта герт ясвр кегдхмн.

Тер мет Яшкульск районд селәнә социальн делгрлтин программ үүлджәнә. Специалистнрин темдглсәр, дундлад арвн өрк-бүл бәәдг гертә болна. Энүнә төлә күн болһнд зун тәвн минһн арслнг йилһж өггднә. Уд луга Чимидовихна өрк-бүл шин бүүрт нүүж орх. Тер мет нег давхрта шин гер бәрх зура бәәнә. Тегәд эднә элгн-саднь дөн болхдан белн бәәнә.

Сергей Андрюшкина келсәр, ода шин герин проект кегджәнә, удл уга төгсх. Өдгә цагт герин ул тәвгдв. Эн жил шин гер эдлврт орх зөвтә. Урднь бәәрн бюджетас мөнгн баһар ирдг бәәсмн. Давсн жилд бәәдл ясрв. Ода танһчин бюджет, бәәрн хазн болн эздүдин мөнгн олзлгдна.

Давсн жилд федеарльн бюджетас аврн һурвн өрк-бүлд дөрвн сай арслнг йилһж өггдлә, танһчин бюджетас нег сай дөрвн зун минһн арслнг ирв. Тавн зун минһн арслнг бәәрн бюджет йилһж өгсмн. Шин программ экләд күцәгдснәс авн зун дөчн өрк-бүл бәәг гер тосхж авхин төлә бөнцл мөшнг авч чадв.

Ээнән Делгр, Ирчин Алексей