Баһ тетквртә баһчудт буйнч седклин керг-үүлдвр бүрдәгдв
Баһ тетквртә өрк-бүлмүдин көвүд-күүкд болн инвалид бичкдүдин төлә баһчудын организац, эрүл-менд харлһна министерств болн келн-улсин музей буйнч седклин керг-үүлдвр күцәв. Энүнд жирн бичкдүд орлцв.
Эн өдр нааран ирсн баһ тетквртә өрк-бүлмүдин бичкдүдин болн инвалид бичкдүдин төлә Пальмовин нертә келн-улсин музейин цуг залмуд секгдв. Негдгч багин инвалид Савр Саранговин келсәр, иим керг-үүлдвр йир олз-туста. Музейд ирсн баһчуд шин медрл авна. Маднд цуг халхаснь дөн күргх кергтә. Күн һанцхарн бәәж чадшго. Талдан улсла харһад күүндх кергтә, эврәннь ухан-тоолврарн хувалцх кергтә болна.
Иим көвүд-күүкдин ик зунь түрүн болж музейин көдләчлә хамдан иим ке-сәәхн зургуд үзжәнә. Тер тоод арвн негн наста Дима Герасимовд иим экскурсь йир соньн болв. Эн көвүн кесг жилдән сүүдр дәвсрн күнд гемәр гемтжәнә. Дима музейд эврәннь ах Андрейта, эктәһәр болн бичкн дүүтәһән ирж.
Музейд ирсн сурһульчнр урднь иим соньн экспонатмуд бәәхин тускар сандго бәәсн болх. Үлгүрнь, мана танһчин у-өргн тег байн болн ке-сәәхн тускар эдн ухалжасн уга. Иим олн-зүсн мал-аһрус болн өвәрц урһмл талдан һазрт үзж болшго. Сурһульчнрин зәрмнь иим соньн экспонатмуд үзчкәд, иргчдән иим эрдм шүүж авх сана зүүв. Элстин арвдгч школын зурһадгч классин сурһульч Максим Ковриковин келсәр, нааран ирсн хөөн, музейин специалистнр сән цәәлһвр кев. Цуг экспонатмудын тускар тодрхаһар келж өгв. Яһж археологуд экспонат малтж авсна тускар келв. Өсхләрн археолог болх санан орв.
Иим соньн керг-үүлдвриг бичкдүдин төлә танһчин эрүл-менд харлһна болн социальн делгрлтин министерств, баһчудын организац болн келн-улсин музей негдәд хамдан түрүн болж бүрдәж давулв. Түрүн дамшлт сән ашта болж һарв.
Хотл балһсна инвалидмудын олна организацин ахлачин үүл даажах Арнзл Болдыревин келсәр, зәрм улс эрүл-менднь му болад, талдан улс олн давхрта герт бәәснәс көлтә ирж чадхш. Иим улст дөн болад гертнь однавидн. Зургуд үзүләд, седклинь байрлулх кергтә. Иргчдән чигн иим нөкд болх зура бәәнә. Ирж чадшго улс тал “Молодая гвардия” болн “Единая Россия” партин гешүдиг дуудж авад, инвалид улст иим керг-үүлдврт орлцхин төлә дөн күргнә.
Музейд ирсн жирн инвалид-бичкдүдиг иим кеәвр дөннәд, нөкд болхла, эднә чееж сергнә, седкл байрлна. Күнд бәәдлд туссн көвүд-күүкд иим цаһан седклтә керг-үүлдвриг удандан мартлго, бүрдәһәчнрт ик ханлтан өргжәнә.
Хавтхна Элла, Хавтхна Анатолий
