Эндр Элст балһснд оютнрин педагогическ отрядмудын цугәрәсән форум көдлмшән эклв. Энүнд мана орн-нутгин дөчн дөрвн регионас нәәмн зун күн ирж орлцжана.

Эндр теегин йосна бичгин өдр. Нег минһн йисн зун йирн дөрвдгч жилин апрелин тавн Хальмгин һол закан —Теегин йосна бичг батлж авгдсмн.

Мана хотл балһснд хаврин түрүн субботник болжана. Министерствсин ведомствсин көдләчнр һаза һарда уульнц, паркмуд болн эргндк аһу цеврлһнә көдлмш күцәх.

Эндр Хальмгин хотл балһснд региональн чинртә предметмудар болсн олимпиадын диилчәнр ачлгдв. Дәкәд нег тодлад келхлә, олимпиад мартын чилгчәр болв.

Сурһульчнр дунд наркотикүд олзлһнас гетлүлһнә төрәр танһчин номин дамшлтын конференц болв. Энүнә йовудт “Умей сказать нет” нертә тренинг болв, сурһульчнриг наркотик олзлһнас гетлүлһнә төлә психологическ наадд болн даслт бүрдәгдв.

Элст балһсна уульнцд таксофонмудын то кесг холванд баһрхмн. Иим аппаратмуд хәләж ясхин төлә дала мөнгн кергтә гиж Әрәсән залһлдана болн олна коммуникацин министерствд келнә.

Ода эврәннь машиһан темдглж бичүлхин төлә, маши залх иткүлин цаас һарһулж авхин төлә интернет олзлж болх. Тегәд ГИБДД-н әнгд ик чеерүдт зогсх керг уга.

Эндр Хальмг танһчин толһач Алексей Орлов онц улсла харһад күүндв. Тер мет әмтнлә болсн күүндврт министерствсин-ведомствсин элчнр орлцв. Эдн улсиг үүмүлжәх төрмүдәр цәәлһвр өгв.

Хальмг танһчин правительств эн жил царцахала ноолда кехин төлә селәнә эдл-ахусд дөн болхдан белн. Энүнә төлә танһчин толһачин даалһврар шишлнг санг тогтагджана.

Эн өдрмүдт танһчин селәнә эдл-ахун көдләчнр хаврин эрт культурмуд тәрлһнә көдлмшән цаарандан күцәжәнә. Эндр өдрт арвн минһн гектарин аһуд буудян экн тәргдв.

Нөкд болхин төлә хаалһ өг. Элст балһснд түүмр унтралһна церглтин көдләчнр ГИББД-н инспектормудла хамдан автомобилистнр шишлнг машидт яһж хаалһ өгчәхин тускар бүртклһ кежәнә.

Эндр Хальмг танһчин толһач Алексей Орлов танһчин салдснрин экнрин комитетин гешүдлә харһлт кев. Эврәннь халхасн цуг кергтә дөн күргхән Алексей Орлов медүлв.

Амр Санана нертә келн-улсин библиотект Эрдни Канкаевин шин дегтрин презентац болв. Энүнд зокьялч орчулсн Крыловин баснь хальмг келәр барлгдв. Шин дегтрин презентац бичкдүдин дегтрин нарта-делкән өдрлә ирлцүлж кегдв.

Усна сурвлжна турва эвдрхлә, аюл болхла эс гиж зүркн өвдхлә 112 эс гиж 911 телефоһар жиннүләд дөн авч болх. Элст балһснд дежурн-диспетчерск негдсн церглт цаарандан көдлжәнә.

Элст балһсна хаалһс шинрүлж ясхин төлә ут-тоодан далн сай арслнг кергтә. Иим мөнгн ода хотл балһсна хазнд уга. Хаалһст нүк бөглдг жил болһн кедг ясврт чин мөнгн күртжәхш.