Шин хаалһ Астраханск областиг Дагестанла болн Хальмг танһчла залһлдулх. Зураһар арвн тавн дууна түрүн әнгнь эн жилин чилгч күртл тосхгдх зөвтә. Шин хаалһ иргч жилин зунар эдлврт орулгдх зурата.

Шинәс тогтагдсн крестьянск-фермерск эдл-ахусд болн онц эзнә эдл-ахуһас һарсн улст Хальмг танһчин аһуд льгот өггдхмн. Эдн алвна, экономическ льгот авх, һазрину частк өглһнд бас льготта болх.

«В их лицах отражен 20 век» нерәдлһтә һәәхүл Пальмовин нертә келн-улсин музейд секгдв. Керг-үүлдвр әрәсән олн-әмтнә зурач Ким Мергенович Ольдаевд нерәдгджәнә. Энүнд 40 һар көдлмш үзж болжана.

Элст балһснд бичкдүд дунд межрегиональн каратэн марһан болв. Энүг Әрәсән наркоконтролин органмуд тогтасна арвн жилин өөнд нерәдгдв. Дөрлдәнд Астраханск, Волгоградск, Ростовск областьмудын болн хальмг танһчин бөкнр дииләчән йилһв.

Хальмгин фермермүд ик хургт цуглрад, эдниг үүмүлжәх төрмүдәр тодрха күүндвр кев. Тер тоод банкас өгья мөнг авлһна, продукцан хулдлһна, машина тосн түләнә үнин болн талдан чигн төрмүдәр күүндв.

Тер мет эндр өдрәс авн эрдм-сурһулин учрежденьсин багшнрин жавл арвн тавн процентд өсх. Немр эрдм-сурһулин багшнрин болн производственн сурһулин багшнр-мастермудын жалв арвн процентд икдх.

Эн жилин апрелин нег шинәс авн күч-көлснә пенсин кемжән өсжәнә. Тер мет эн сарас авн социальн пенсь бас икджәнә. Энүнә тускар эндр Пенсионн сангин региональн заллтд болсн пресс-конференцд келгдв.

Эврәннь уңг-тохмин туск медрлән хөрн хойрдгч тойгта хотл Элст балһсна бичкдүдин садын көвүд үзүлв. эдн эврәннь эк-эцктәһән хальмг келәр өрк-бүлин туск презентац белдв.

Элст балһснд кубок “Уралана” нертә футбольн фестиваль эклв. Энүнә нәәмн команд орлцжана.

Хаврин амрллһна өдрмүдт бичкдүдин үүдәлтин бәәшнгин ул деер бичкдүдин лагерь бүрдәгдж көдлжәнә. Эн лагерьт балһсна школмудын көвүд күүкд орлцжана. Эн жилд амрллһна лагерь “Тимур болн энүнә үүрмүд” гиж нерәдгджәнә.

Танһчин толһачин медлд үүлджәх медәтнрин хүүв эн жил түрүн сүүрән кев. Энүнд төрскән харсгч дәәнд диилвр бәрснә далн жилин өөнд белдвр келһнә төрмүдәр күүндвр кегдв.

Эндр Пенсионн сангин заллтин мобильн клиентск церглт Приютненск района Первомайский поселкд һарч йовв. Урднь эдн эн района Воробьевка селәнә улст цәәлһвр кев.

ДПС-ин инспектор болн энүнә нөкд зарһин засгла харһулгдх. Хаалһин постын цергтин көдләчин болн энүнә нөкдин тускар уголовн керг мөшкәчнр төгсәв. Эдн урдаснь хоорндан үгцәд, мек-тах кеж гиж гемшәгджәнә.

Амр Санана нертә келн-улсин библиотект хальмг танһчин ачта багш Санж Кензеевин зун жилин өөнд нерәдгдсн санлын асхн болв.

Эндр театрин өдр. Эннь актермудын, театральн көдләчнрин болн театрин эрдмд дурта улсин сән өдр. Театрин нарта-делкән өдр Әрәсәд йосна государственн чинр зүүжәхш.