Хаврин дулан өдрмүд кезә тогтх?

Элст балһсна әмтн дулан нарта өдрмүдт удан байрлсн уга. Сүл өдрмүдт үүлн бүркәд, хур оржана, зөвәр киитрв. Йириндән апрель сард мана танһчд хамгин ке-сәәхн цаг болна. Дуларад киитсрн бийнь, элстихн хаврин кемд байрлжана.

Марина Хомутникован келсәр, ода бүркг киитн өдрмүд болсн бийнь, хавр чеежәс һархш. Хур оржасн бийнь, эргндк аһу цеврлһнә көдлмш талдан улсла хамдан күцәжәнә. Пенсионеркин келсәр, тенгрин бәәдл таасгджана. Болв дула өглһнә кем болзгаснь эрт төгсснь энүнд таасгдсн уга.

Элст балһсна лусин ик зунь хаврин кемиг хамгин икәр дурлж күләнә. Эн кемд кеер һарад, цевр аһар киилж болна, йиртмжин ке-сәәхн бәәдл һәәхж болх. Тегәд чигн олн улс дула болн нар тенкән уга гидгәр күләнә. Зуг зәрм әмтнд бүркг өдрмүд му нилчән күргжәхш.

Эн күүкд күүнә келсәр, хавр хамгин икәр таасгдна. Хаврин кемд төрж. Йиртмж цецгәрнә, дурн ирнә. Ода тенгрин бәәдл гемм уга сән, зуг сүл өдрмүдт хур оржана гиж эн залу күн келв. Энүнә темдглсәр, хавр гем уга сән болжана, аһар цевр. Эн залу күүнә келсәр, эзнә гемдүт бәәнә. Тегәд гертнь дулан. Хавр дулан болв, зуг сүл цагт хур оржана гиж эн темдглв. Нар тенкән уга гидгәр күләжәнәвидн гиж эн күүкн келв.

Апрель сарин эклцәр тогтсн дулан өдрмүдиг серүн хур-чиигтә өдрмүд сольв. Синоптикүдин келсәр, өдгә цагт тогтсн тенгрин бәәдл иим кемлә ирлцжәнә. Ода аһарин кемжән дундлад негн-дөрвн градуст киитн болжана. Гидрометеоцутхлнгин синоптик Надежда Мучаеван келсәр, эн долан хонгин чилгч күртл иим серүн өдрмүд болх. Танһчин зәрм ормар ахр болзгт хур орх. Аһарин кемжән сөөднь һурвн градусас авн нәәмн градус күртл дулан болх. Өдртнь аһарин кемжән арвн хйор-арвн долан градус күртл дулархмн.

Хаврин тенгрин бәәдл ямаран чигн занган үзүлв чигн, эн кем зурачнрт болн шүлгчнрт хамгин ке-сәәхн цаг болна. Бүркг хур-чиигтә өдрмүд болхла, хаврин кемиг шүлгчнр эврәннь үүдәврмүдтән яһж бичсн тускар эс гиж апрель сард у-өргн халмьгин теегт бамб цецгүд тенгс мет налаж цецгәрсинь дотран санхла чееж сергж, седкл байрхмн.

Ээнән Делгр, Настан Сергей