Хальмгт Италин опер үзүлгдх
Хальмг танһчд түрүн болж Италин композитор Доменико Доницетти үүдәсн “Рита или пиратский треугольник” нертә опер тәвгдх. Нег әнгтә шог наадна опериг түрүн болж Государственн симфоническ оркестрин болн хорин артистнр үзүлх.
Гиичлүрин эзн күүкд күн Рита өрк-бүлтәһән бәәхтә жирһл эдлжәнә. Номһн болн һольшг зангта эврәннь хойрдгч Беппо залуһан һартан авад, чанһ бүртклһ кенә. Оперин һол дүр Ритаг госфилармоня дууч Эвелина Лиджиева нааджана. Рита нойрхг болн күнд зангта күүкд күн. Артистк Эвелина Лиджиеван келсәр, Ритан занг энүнә зангла әдл биш.
Хальмгин государственн филармоня дууч Эвелина Лиджиеван келсәр, шин наадн икәр таасгдж, соньн болж медгдв. Артистын дамшлт бичкн болад, кесгтән белдвр кех кергтә болв. Ритан дүр йир жанһрта. Күсдундур сарин эргцд Ритан дүр күцц медж чадх зөвтә бәәж.
Композиторин бичсәр, Ритан түрүн залунь хүрмин хөөн тенгст һалв салькн болсн кемд геедрж одна. Геткн гиичлүрт пират Гаспар хонхар ирнә. Эннь геедрсн залунь болж һарна. Түүмр шатсн кемд Ритань әмнәсн хаһцв гиж сонсад, бийән белвсн залу гиж тоолдг бәәж. Нег үлү, Алжирин нег күүк буулһхар седж. Гаспарин дүриг Астраханск государственн филармоня дууч Максим Шербитский нааджана.
Астраханск государственн филармоня дууч Максим Шербитский келсәр, көдлхд йир соньн болв. Пиратын дүр нанд таасгдв. Иим дүрмүд наадхдан дурта. Оперт үзүлгджәх йовдл инәдтә-шогта. Сцен деер үзүлгджәх йовдлмуд хәләһәчнр медж чадх гиж санжана.
Иим кевәр тогтсн бәәдл хойр залуд таасгджахш. Тегәд эдн көзр наадад кен гиичлүрин эзн күүкд күн Ритала бәәхинь медж авна. Дииләч Ритала бәәх, шүүгдсн күн гертәс һарч йовх зөвтә. Аштнь Гаспар дуран өгсн күүкн талан һарч йовна, Беппо болхла дурта авальтаһан үлднә. Беппон дүриг баһ наста артист Лиж Доржинов наадв.
Хальмг танһчин государственн хорин артист Лиж Доржиновин келсәр, гергнәсн әәдг залун дүр нааджана. Эннь энүнд ирлцхш. Тегәд иим дүр наадхд жанһрта болв.
“Рита или пиратский треугольник” нертә бичкн опериг Италин композитор Доменико Гаэтано Доницетти нег минһн нәәмн зун дөчн негдгч жилд үүдәсмн. Шин наад тәвжәх улсин тоолврар, шог-инәдтә тууж хальмгин хәләһәчнрт таасгдх зөвтә. негүлү, иим көгжмин болн драмин наадн хальмгин сцен деер үзүлгдәд уга.
Нарта-делкәд нер туурсн опериг государственн концертн залд апрелин арвн хойрла хәләж болх.
Ээнән Делгр, Колдан Церн
