Цаһан алхц гемәс гетлүлһнә тәрлһнд бичкдүдт кегджәнә

Хальмг танһчд цаһан алхц гемәс гетлүлһнә төлә бичкдүдт тәрлһн кегджәнә. Ут-тоодан энүнд нег наснас авн долан нас күртл дөврн минһн көвүн-күүкн орлцх. Жил болһн иим керг-үүлдвр Европин долан хонгин керг-үүлдврин программар кегднә. Мана үүдәгч баг поликлиникд одад, иим тәрлһн ямаран тустаһинь медж авв.

Саглулгч тәрлһ кехлә бичкдүдин эрүл-менднь бат болна. Жил болһн Хальмг танһчд һурвн минһн бичкдүд цаһан алхц гемәр гемтнә орсаһар ветряная оспа. Иим хальдврта гем дарунь тархагдна. Энүгәрн талдан гемәс йилһрнә. Хойр минһн арвн хойрдгч жилд мана танһчд иим хальдврта гемәр гемтсн улсин цуг тооһар тәвн негн процентнь Элст балһснд гемтв.

Бичкдүдин поликлиникин ах эмчин дарук Баира Очирован келсәр, ода цаһан алхц гемәс саглулгч шин эм ирв. Энүг нег наста бичкдүдәс авн долан нас күртл кех. Хойр дәкж. Апрель сард болн май сард хойрдад кехмн.

Эндр педиатр Людмила Дорджиевад талдан бичкдүдлә хамдан гетлүлгч тәрлһ авх көвүд-күүкд ирж. Эннь нег наснас авн һурвн нас күртл бичкдүд болжана. Иим тәрлһ юуна төлә кегджәхин тускар эмч цәәлһвр өгчәнә. Бичкдүдин поликлиникин педиатр-эмч Людмила Дорджиеван келсәр, шин закврар иим тәрлһн кегджәнә. Эннь бичкдүд гемтшгон төлә кегджәнә. Эн экин келсәр, иим бичкн цагт эртәсн тәрлһ кех кергтә. Тиигхлә санамр бәәхвидн.

Хойр наста икр бичкдүдиг Даяна болн Заянаг эк-эцкнь эврән авч ирж. Эдниг дошкольн учрежденьд өгхин өмн цаһан алхц гемәс саглулгч тәрлһ кехәр эдн шиидв. Эднә өрк-бүлд дәкәд хйор күүн бәәнә. Тегәд хальдврта гемәс гетлүлхин төлә иим тәрлһ эртәсн кех кергтә гиж эднә экнь тоолжана. Хойр икр күүкән авч ирж. Иим хальдврта гемәс эрк биш тәрлһ кех кергтә. Тегәд нааран ирж.

Баһ наста эцк Бадма Ширипов болхла эврәннь һурвн наста көвүһән бичкдүдин эмчәс зәнг авсна хөөн нааран көвүтәһән ирж. Бадма Шириповин келсәр, көвүнь бичкдүдин садт оржана. Тегәд нааран ирв. Иим гемәс гетлүлхин төләд тәрлһ кехлә сән болх. Юнгад гихлә дошкольн учрежденьд бичкдүд дала. Иим гемм дарунь хальдна.

Сүл һурвн жилд цаһан алхц гемәр гемтлһн мана танһчд дөчн негн процентд өсв. Зәрмдән иим гемин хөөн дәкнәс бичкдүд гемтнә. Эднд нурһлж арсна инфекц хальдна, өөшгин болн талдан чигн гемәр гемтх әәмшг бәәнә. Тер мет цаһан алхц гемәр гемтсн бичкүдин арвн тавн процентнь иим вирус үлднә. Иргчдән бичкдүд өсхлә эн вирус әәмшгтә арсна гемд хүврх әәмшгтә болна. Цаһан алхц гемәс сагллһна тәрлһн иим әмшгәс гетлүлх арһ өгнә. Бичкдүдин поликлиникин ах эмчин дарук Баира Очирован келсәр, цуг эк-эцкнр эврәннь үрдүдән тәрлһнд авч ирх зөвтә. Дуудвр кежәнәвидн. Иим тәрлһн йир олз-туста болна. Ирчгдән чигн иим саглулгч тәрлһн туста болх.

Эмчнрин келсәр, иим тәрлһ авх дәкәд нег олз-тус бәәнә. Эднә тоолврар, тәрлһ авсн бичкдүдин иммунитет түрүн өдрәс авн тогтна.

Арстана Светлана, Настан Сергей