Бузр ус цеврлдг сооруженьсиг шинрүлж ясх кергтә
Өдгә цагт Элст балһсн ик делгрлт авчах балһсн болжана. Энүнә участк болһниг салу церглт хәләж харжана. Ик кезәнәс авн ик балһсдт жанһрта инженерн сооруженьс көдлжәсмн. Элст балһснд иим өдгәц агин некврлә ирлцәтә сооруженьс бәәнә. Эннь амр биш эдл-аху. Элст балһсна канализационн эдл-аух тууж тәвн доладгч жиләс авн эклсмн. Ода энүнд шинрүлһнә ясврин көдлмш кех кергтә. Энүнә оборудовань найн хойр процентд хуучрв.
Хальмг танһчин хотл балһсна канализационн залһлдан утдан зун арвн тавн дууна тогтажана. Ода уудг усна сурвлжар Элст балһсна улсин жирн хойр процентнь теткгджәнә. Эдл-ахун, бәәцин болн химическ хог-бог канализациолнн цеврлһнә сооруженьст орулгджана. Иим сооруженьс Элст балһсна дөрд-өмн үзгин районд бәәнә. Цеврлһнә сооруженьст һучн хойр күн көдлжәнә. Проектн күәчр энүнд нег өдртән тәвн минһн кубическ метр бузр усн ирх зөвтә. Ода болхла энүгәр зуг хөрн ттавн кубическ метр усн гүүжәнә. Эдл-ахун болн бәәцин бузр усн зун сантиметр диаметр турваһар шишлнг камерт орж ирнә. Энүнә хөөн энүг шишлнг оборудованяр орулх кергтә. Тенд бузр уснас минеральн күнд тоот йилһгднә. Бузр усиг механическ кевәр цеврлһнә көдлмшиг көдләчнр һарарн кежәнә. Энүнә хөөн усн аэротенкин камерт орж иржәнә. Энүнд Ставрополь балһснд хулдж авдг биологическ тоотар цеврлнә. Шишлнг лабораторь өдр болһн усна чинрин шинжлт кежәнә.
“Элиставодоканал” предприятин лабораторин ах инженер Алтайка Мушаеван келсәр, өдр болһн бузр усна чинр шинжлгдж хәләгднә. Үлдсн хлор илткж авна. Канализацд орджг бузр уснд олн микробо бәәнә.
Бузр ус цеврлһнә хамгин ик чинртә девснгнь — шалдрнг азотар бузр ус цеврлһн. Иим производствд бачм чинртә йовдл учрхла күн болһн противогаз белн бәәнә, көдләчнр ямаран үүлдвр күцәхән меднә. Әәмшгтә хлорин ормд экологическ әәмшг уга бәәлһнә төлә цеврлһнә сооруженьст гипохлорид олзлх селвг өгв.
“Элиставодоканалын” ах инженер Павел Убушаевин келсәр, хойр минһн арвн һурвдгч жилд иим әәмшгтә обьектас һарад, талдан дөрвдгч девснгтә әәмшг уга обьектд орх санан бәәнә. Хойр насос хулдж авч, гипохлорид бас хулдж авх арһ учрв. Эн жил Элст балһсна бюджетд энүнә төлә мөнгн йилһж өггд зөвтә. Хойр минһн арвн дөрвдгч жиләс авн гипохлорид олзлх зура бәәнә.
Кесг девснгәр механическ, микробилогическ болн химическ эв-арһар бузр ус церлһнә хөөн олз-туста бактерийта усн Элистинка һолд орулгджна. Энүнә хөөн усн Заячий нертә боодгт гүүж орна. Эн боодг Әәдрхн —новороссийск хоорндк хаалһин хөрн дуунад бәәнә.
Хальмгин Роспотребнадзорин заллтин ахлачин дарук Жанһр Санджиевин келсәр, канализационн цеврлһнә сооруженьсин көдлмшт дуту-дундс бәәнә. Бузр ус цеврлһн зуг жирн процентд күцәгднә. Эмнүлин учрежденьс ус бузрдаһад, антибиотки болн талдан чигн эм хайна. Тер мет әмтн бәәцин химин хог-богар ус бурдана.
Элст балһсна канализацд әмтн нефтепродукт, бузр кенчр болн талдан чигн әәмшгтә хог-бог асхна. Энүнәс көлтә унтә обрудовань эвдрәд, эдлврәс һарна. Хойр минһн арвн һурвдгч жилд хотл балһсна канализационн систем яслһна төлә Элст балһсна бюджетас хөрн тавн сай арслнг һарв. Бүклднь эн обьект шинрүлж ясхин төлә нәәмн зун сай асрлнг кергтә болх.
Иим күнд бәәдлд Элст балһсна һардачнр усар тетклһнә системиг хәләж цаглань ясад, эдлврәс эс һарһажахнь эднә көдлмшин сән аш гиж келж болх. Энүнәс көлтә олн-зүсн хурц төрмүд хаһлгджана.
Хавтхна Элла, Эрнжәнә Эрднь
