Шин жиләс авн бичкдүдтә өрк-бүлмүдт алвна хаслтын кемжән икдх
Шин жиләс авн бичкдүдтә өрк-бүлмүдт алвна хаслтын кемжән икдх. Энүнә төлә алвна кодекст сольвр орулгдв. Урднь жалвас нег минһн арслнг хасгдад, үлдснь мөнгнәс арвн һурвн процент алвн авгддг билә. Шин жиләс болхла жалвас нег минһн дөрвн зун арслнг хасгдад, үлдснь кемжәнәс алвн авгдх. Дундлад өрк-бүл болһн сар болһн зун найн хойр арслнг әрвлж чадх. Эцк угаһар үрән өскжәх улст эн кемжән хойр холванд икдх. Тер мет иим льгот олн үртә өрк-бүлмүдт бас өггх. Энүнә тускар тодрхаһар мана сюжетд келгджәнә.
Үрдүдән өскжәх Әрәсән өрк-бүлмүдин ик зунь өдгә цагт мөнгн ховр болад түржәнә. Иим улс өдр болһн мөнгән тоолад, ямаран хот-хол, хувц-хунр хулдж авхин тускар ухалж әрвлнә. Тегәд олн үртә өрк-бүлмүдт алвна хаслтын кемжәг икдүлх зәнг эдниг байрлулх зөвтә. Урднь жалвин нег минһн арслнгас арвн һурвн процент алв авдго бәәсмн. Зәрм әмтн иим льгот авчахин тускар меддгго бәәж гиж Элст балһсна бәәрн күүкд күн Айта Санджиева келнә. Айта Санджиеван келсәр, алвна хаслтын кемжәнә тускар газетмудас медж авч. Иим льгот бичкн болв чигн, шангин өгчәх дөн сән болна.
Шин жиләс авн алвна хаслтын кемжән сольгдх. Энүнә кемжән өрк-бүлин үрдүдин тооһас иштә өггдх. Өрк-бүлд үрдүд олн боләхла, алвна хаслытн кемжән икдх. Хойр үртә өрк-бүлмүдт алвна хаслт нег минһн дөрвн зун арслнг тогтах, һурвн болн энүнәс даву үртә өрк-бүлд, арвн нәәмн нас күрәд уга инвалид-үрнд эс гиж хөрн дөрвн нас күрәд уга негдгч эс гиж хойрдгч багин инвалид-оютнрт һурвн минһн арслнг алвна хаслт өггдх.
Тегәд һурвн үртә өрк-бүл сардан күсдундур минһн арслнг әрвлж чадх. Хальмг танһчар Әрәсән алвна церглтин әнгин ахлач Валерий Дорджиевин келсәр, иим алвна хаслт өрк-бүлмүдт сән дөн болх, нег үлү олн үртә улст сән түшг болжана.
Болв ик жалв авчах улс иим алвна хаслт зуг долан сардан авх. Мана танһчд дундлад әмтн арвн-арвн хойр минһн арслнг жалв авчана. Тегәд эдн цугтан алвна хаслт авх. Тегәд үртә өрк-бүлмүдт нег үрнд зун найн хойр арслнг хаслт авхмн. Болв ирх хойр минһн арвн хойрдгч жиләс авн цуг көдләчнр урднь авчасн дөрвн зун арслнга алвна хаслт авшго. Тегәд арвн һурвн процентин алвна хаслт цуг жалвас авгдх.
Санкун Кермн, Хулхачин Николай
