Монһлын делегац Хальмг танһчд ирсн бәәнә
Эн өдрмүдт мана танһчд Барун Монһлын делегац ирсн бәәнә. Хальмгин государственн университетин оютнрла болн багшнрла харһлт кев. Энүнә өмн хол һазрас ирсн гиичнр КИГИ РАН-а номтнрла харһад күүндв, Яшкульск районд малчнрин хошт одв, Элст балһсна цутхлнг хурл Бурхн Багшин Алтн сүм һәәхв, келн-улсин музейд одв. Давсн бембә өдр делегацин гешүд ГТРК “Калмыкия” коллективла харһад күүндв.
Телевиденьд болсн харһлт йосна харһлт болв. Тер бийнь бүлән күр-күүндвр кегдв. Энүнд нег халхар көдлжәх улс харһад күүнджәнә. Гиичнр дунд нурһлж телевизионшикүд Монһлын әзнә нег компаня көдләчнр ирсмн. Нег үлү, энүнә генеральн директор делегациг һардж ирв. Мягмасурәна келсәр, Хальмгт урднь чигн ирсн бәәж. Хойр минһн йисгч жилд хальмгуд Әрәсән ханьд орсна дөрвн зун жилин ончта өөнин байрт орлцсндан ик байрта бәәнә. Тер цагт Хальмгин телекомпаня һардачнрла харһад күүндсн билә. Ода телерадиокомпань толһалжах Михаил Ткачевла болсн харһлтын йовудт эднә һарджах компаньсин үүлдврин тускар келгдв, иргч көдлмшин зуран тускар хувалцв. Монһлд өдгә цагт цифрин телевиденя делгрлтин программ бас күцәгджәнә.
Михаил Ткачевин келсәр, бәәрн цуг телестудьс болн ВГТРК-филиалмуд хойр минһн арвн доладгч жил күртл цифрин эв-арһар көдлх. Удл уга дәкәд нег ик чинртә төсв күцәгдхмн. ВГТРК-н Хальмгин филиалын директор Михил Ткачевин келсәр, өдр-сө уга кедг телеүзүлвр эклх зура бәәнә. Эннь “Россия 24” нарта-делкән каналд үзүлгдх. Апрелин нег шинәс авн Хальмгин телеүзүлвр эн каналд һарх.
Харһлтын йовудт хамцу күцәх нөкцлтин тускар тодрха күүндв болв. Монһлын делегацин һардачин келсәр, эннь ик чинртә төр болжана. Үүдәлтин халхар кегджәх нөкцлт келн-улсин хоорндк залһлда батрулһнд сән нилчән күргнә. Мягмасурэна келсәр, Хальмг танһчд болсн йовдлмудын тускар эдн “Вести-Калмыкия” программин сайтас медж авчана. Энүнә келсәр, тана сайтыг сәәнәр меднәвидн. Кергтә цуг зәнгиг эн сайтас авнавидн. Хальмг келн-улсин туск зәнг маднд соньн болна.
Күсдундур жил хооран бүрдәгдсн интернет сайт олн әмтнд тааста болжахин тускар гиичнрт келж өггдв. Михаил Ткачевин келсәр, ода мана сайтыг Әрәсән регионмудт нег сай күн хәләнә. Эннь сән үзмж болжана.
Мягмасурэна темдглсәр, федеральн болн региональн халхас телевидень дөннжәхнь сән керг. Иим дөн телевиденьд сән урмд өгнә.
Хойр телекомпань хоорндан электронн материалар сольгдсн деерән, журналистнр нег-негн талан йовж чаджана. Монһлын телевиденя үүдәгч баг Хальмг танһчд ирәд, документальн фильм цокж авчана. Монһлын журналистнрин келсәр, Хальмг танһч болн Монһлын хоорндк залһлдан яһж батржахин тускар шин фильмд келгдхмн. Хол һазрас ирсн гиичнр Яшкульск районд нег малын хошт одв. Энд Шинжәнәс ирсн малчнр көдлжәнә. Үвлин кемд малчнр хәләжәсн малан яһж үвлзүлжәхин тускар эдн өөрхн таньлдв.
Монһлын делегац мана танһчд дәкәд олн соньн харһлтс кехмн. Гиичнрин иткүлсәр, эднә цокж авсн документальн фильмиг Монһлд болн Хальмг танһчд хәләж болхмн.
Чучян Валентина, Хулхачин Николай
