Олимпийск һал тосж авлһнд белдвр кегджәнә

Олимпийск һал давж һарх Әрәсән цуг субьектмудын һурвн минһн балһсд-селәд дунд Элст балһсн бас йовна. Эстафет Москва балһснд октябрин доланд эклв. Олимпиадын туужд Әрәсән эстафет хамгин ут болх. Аштнь һал февралин доланд Сочи балһснд олимпийск наадна секлһнә байрт күрх. Ода Хальмгин хотл балһснд олимпийск һал тосж авхин төлә белдврин көдлмш кегджәнә. Мана үүдәгч баг Элст балһсна төмр хаалһин станцд кегджәх ясврин көдлмшәр соньмсв.

Ут-тоодан Сочи балһснд болх олимпийск һал жирн тавн минһн дуунад йовх. Тер тоод автомобиляр, поездар, самолетар, мөрн тергәр, ноха цанар чигн авч йовх. Элст балһснд олимпийск һал төмр хаалһин вокзалас автомобильд цаарандан авч йовгдх. Әәдрхн балһснд һал машиһар күрггдх. Иим көлгн-күчәр февралин доланд олимпийск һал Сочи балһснд күрх зөвтә. Ода Элст балһсна төмр хаалһин станцд ясврин көдлмш гүргүдән. Энүг октябрин нег шинд эклв. Ноябрин арвн тавн күртл станц шинрүлж кеерүлгдх зөвтә. Сочи балһснд болх Олимпиадын өмн өргнд вокзал шинрүлгджәнә. Нааран олимпийск һал ирх зөвтә. Станцин ахлачин келсәр, пассажирск платформд шин асфальт делггдх. Тер мет шин давшур углж тәвгдх, цецгүд тәргдх, вокзалын герин һазадк кеерүлж сәәхрх. Өдгә цагт герин һазадк эрсиг Әрәсән төмр хаалһин компаня көк — бор өнгәр ширджәнә.

Элст балһсна төмр хаалһин станцин ахлач Жанһр Обушиевин келсәр, ода энд цуг ясврин көдлмш кегджәнә, герин фасад цаһалһад ширджәнә. Терз сольгдх. Хойрдгч давхрт бәәх зал бас шинрүлгдх. Пассажирск платформд асфальт делгх.

Тер мет ясврин көдлмш вокзалын герин дотр бас кегджәнә. Энүнә негдгч давхрт хойр минһн арвн негдгч жилд “Домодедово” аэропортд аюл болсна хөөн шинрүлһнә көдлмш күцәгдлә. Хойр минһн дөрвдгч жилд вокзалын ора ясгдв.

Танһчин тосхлтын, көлгн-күчнә болн хаалһин эдл-ахун министрин дарук Юрий Ользеевин келсәр, энүнд шил витражмудын ормд шин пластик тәвгдх. Герин ора бас тас талдан болх. Вокзалын эрсиг бас шинрүлх зура бәәнә. Ут-тоодан долан сай арслнга ясврин көдлмш күцәгдх. Энүг РЖД йилһж өгв. Залд шин терз тәвснә хөөн, сәәхн бәәдл һарх. Өдгә цагин материалас кегджәнә.

Сүл цаг күртл вокзалын гер энүг секснә хөөн тас ясгдад уга бәәж. Жирн тавгдгч жилд мана танһчиг һарджасн Баснг Городовиковин ни лчәр Элст балһсна төмр хаалһин станцд түрүн поезд ирсмн. Иим көдлмш күцәхд бас ик чидл болн седвәр кергтә. болв. Хойр минһн доладгч жилд Элст-Ставрополь — Москва хоорнд поезд йовдган зогсв. Тер цагас авн эн гер тер кевәрн бәәв. Ар Кавказин төмр хаалһин медлд бәәх вокзалын гер эн өдрмүдт тас талдан бәәдл һарчана. Энүг шинрүлснә хөөн Әрәсән төмр хаалһин өдгә цагин некврлә ирлцәтә вокзал болх.

Танһчин тосхлтын, көлгн-күчнә болн хаалһин эдл-ахун министрин дарук Юрий Ользеевин келсәр, Хальмг танһчин толһач Алексей Орлов Әрәсән төмр хаалһин һардачнрт бичг бичәд, Элст балһсна төмр хаалһин станцд ясвр кехин сурсн билә. Энүнә төлә долан сай арлснг йилһж өггдв.

Олимпийск һалын эстафетин бүрдәһәчнрин келсәр, һал авч йовлһна хаалһас нег частан йовх һазрт Әрәсән улсин йирн процентнь бәәх. Олимпийск һал Элст балһснд январин хөрн тавнд ирх. Әрәсән зун һучн сай улсла хамдан танһчин әмтн бас байртаһар һал тосж авх.

Хавтхна Элла, Котина Валерий