Худл мөнгн дәкнәс илткгдв

Дәкнәс худл мөнгн илткгдв. Эннь долан хонгт хойрдгч иим йовдл балж һарчана. Эн саамд Элст балһсна аптекин көдләч полицд эрлһ орулж өгв. Энүнә келсәр, тавн минһн худл цаасн мөнг илткв. Энүг аппаратд шинжлхлә худл болж һарв. Ут-тоодан тавн минһн цаасн мөнгн илткгдв гиж полицд кесг зәнг орж ирв. Ода худл мөнгн МВД-н шинжлһнә криминалистическ цутхлнгд йовулгдв. Худл мөнгнәс бийән яһж саглулхмн.

Давсн хөнгт Элст балһснд кесг худл мөнгн илткгдв. Тер дарунь худл цаасн мөнгиг криминалистическ шинжлтд йовулв. Иим мөнгн яһж эргцд орулсна тускар полицин көдләчнр шинжлт кежәнә. Келхд, цуг худл цаасн мөнгн нег серийта. Тегәд тавн минһн арслнга худл мөнгн нен партяс ирж гиж тоолгджана.

МВД-н цутхлнгин шинжләч-криминалист Валерий Шовгуровин келсәр, йосн мөнгн гилгр болх зөтвә. Худл мөнгн Әрәсән цутхлнг банкин некврлә ирлцхш. Йосн мөнгнә перфорац гилгр болна. Серий болн тойгнь үрх зөв уга. Худл мөнгин нурһлж лазерн принтерт кеж һарһна.

Шинжләчнрин келсәр, зәрмдән худл мөнгн сән чинртәһәр кегднә. Тегәд энүг зуг техническ эв-арһар бүрткж хәләж болх. Кемр әмтн саг болн болһамжтаһар мөнг хәләһәд, авхла худл мөнгиг йосн мөнгнәс йилһж чадх. Специалистнрин келсәр, худл мөнгн талдан цааснас кегднә, микротекст уга болна.

Зөв-йосна органмудын элчнрин келсәр, худл мөнгн магазидт, аптекмудт, машина тосн-түләнә станцд илткгдв. Эн организацин кассирмуд болн арһлачнр худл мөнг медж авч уга. Тегәд ирсн мөнгиг банкд орулж өгсн бәәж. Тенд банкин көдләчнр тавн минһн арслнга худл мөнг илткж авч. Полицин көдләчнрин келсәр, хулд кедг организацс мөнг бүрткж хәләхин төлә өдгә цагин некрвлә ирлцәтә прибормуд олзлх зөвтә. Ода болхла эдн мөнгән әрвлдәд, иим прибормуд хулдж авчахш. Эннь нурһлж хулд-гүүлгәнә халхар көдлдг улс шишлнг эв-арһ олзлхш.

МВД-н барин церглтин һардач Андрей Басхаевин келсәр, худл мөнг тадн өгсн болхла, энүгәр хулд кехмн биш. Эннь уголовн засгла харһулгдх йовдл болжана.

Худл мөнг олзлдг улс ик зунь иим мөнг базрт эс гиж бичкн хулд-гүүлгәнә палаткмудт өгнә. Иим хулд кедг һазрт мөнг бүрткж хәләж болхш. Татьяна Ермакова арвн һурвн жилдән хулдач болж көдлжәнә. Эн жилмүдин эргцд худл мөнг авсн нег чигн йовдл учрсн уга. Иим мөнг нүдәрн хәләж йилһж болхш. Болв дамшлтта хулдач эврәннь эв-арһ олзлад мөнг бүрткж хәләнә.

Хулдач Татьяна Ермакован келсәр, тавн минһн цаасн мөнг өгнә. Эс гиж мөнг сольхинь сурна. Цаасн мөнгн шаржнхла эннь йосн мөнгн. иигж медж авна. Эннь энүнә тоолвр.

Хамдан көдлжәх нег хулдачд худл мөнгн һартнь харһв гиж нег хулдач маднд келж өгв. Худл мөнгиг һарарн иләд медж авч. Худл цаасн мөнгн хойр цааснас кегдсн бәәж. Эн жилин эклцәс авн һучн худл мөнгн илткгдв. нурһлж эдн нег минһн арслнга цаасн мөнгн. Арвн зурһан өдрин эргцд арвн негн тавн минһн цаасн мөнгн илткж авгдв.

Ээнән Ольга, Бадмаран Владислав