ЖКХ-н төрмүдәр олна приемнд әмтн цәәлһвр авв

Эндр Дмитрий Медведевин региональн олна приемнд жилишн-коммунальн эдл-ахун төрмүдәр танһчин хөрн күүнә сурврмудт хәрү өггдв. Энүнд ЖКХ-н болн энергетикин министерствин тарифмудын региональн церглтин болн олн-әмтнә хуралын депутатнр көдлв. Нааран ирсн әмтн дула өглһнә, хуучн гермүдәс нүүлһнә, капитальн ясвр келһнә, әмтн йовдг хаалһс яслһна болн талдан чигн хурц төрмүдәр әмтн эрлһ орулж өгв. Танһчин олн-әмтнә хуралын депутат Эрдни Гагуевин келсәр, “Жанһр” нертә залврин компаня му көдлмшин утскар хамгин олн әмтн ирж келв. Энүнә тускар ирлцнһү шиидвр авгдх. Олн давхрта гермүдин әмтнд эврәннь герин хүүвин шиидвр батлж авад, талдан залврин компаня хәәх селвг депутар Гагуев өгв. Эс гиж эврәннь гертә ниицә бүрдәһәд, цуг төрмүдиг эврән хаһлх кергтә гиж эн темдглв.