Ик-Буурла районд шин школ тохсгджана
Ик-Буурла районд эклц классмудын сурһульчнр йирн һурвдгч жиләс авн хуучн, санитарн кемжәнлә ирлцдго герт сурчана. Энүнд спортивн зал уга, хот уудг хора бас уга болжана. Зуг хөрн жил болад района администрац хуучн гер шинрүләд, сурһулин заведеньд өгхәр шиидв. Ода энд герин ора шинрүлж яслһна көдлмш төгсжәнә.
Специалистнрин иткүлсәр, дигтә долан сар болад урднь бәәсн СПТУ-н хуучн гер тас талдан бәәдл һарад шинрүлгдх. Энүнә ормд өдгә цагин некврлә ирлцәтә йоста бәәшнг мет школ дүнгәж босх. Сурһульчнр иргч жилд у-сарул классмудт сурх гиж ода меджәхш. Хойр давхрта герин ясврин көдлмш цөн өдр хооран эклв. Тосхлытн көдлмш кехин төлә марһанд долан организац орлцв. Аштнь Ставропольск предприять ясврин көдлмш кех зөв авв. Эдн олз-туста таал болн ахр болзгт ясврин көдлмш кехин тускар зарлв.
Тосхлтын организацин прораб Александр Ковылина келсәр, шин школ ке-сәәхн болх. Европин кемжәтәһәр тосхгджана. Школын герин фасад өвәрц болх, бат плитк углж тәвгдх. Иргч жилин май сард шин школ экләд көдлх.
ВЭн обьект шинрүлж яслһна төлә далн сай арслнг олзлгдх. Школын ясврин көдлмш спонсормудын мөнгәр кегджәнә. Ик-Буурла РМО-н администрацин толһачин дарук Александр Владимировин келсәр, нефтин компаня мөнг олзлх төр босхла хамгин түрүн эрдм-сурһулин учрежденя ясврин көдлмшт мөнг йовулхар шиидгдв.
Ик-Буурла района администрацин толһачин дарук Александр Владимировин келсәр, хуучн гер хамхлгдх, энүнә ормд хот-уудг герн тосхгдх. Эннь мана сурһульчнрт сән блег болх зөвтә.
Ода болхла сурһульчнр урднь гиичлүр бәәсн хуучн уутьхн герт сурчана. Энүнд санитарн кемжән күцәгджәхш. Хорасин аһуд зун арвн һурвн көвүн-күүкн сурж чадх. Зәрм классмудт хөрн тавн бичкдүд бәәнә. Тегәд энүнәс көлтә классмудын то өснә. Үлгүрнь, хйор класс бүрдәхин ормд школын һардвр һурвн класс тогтажана. Энүнәс көлтә багшнрт жалв өгхин төлә үлү мөнгн һарчана. Школын директор Екатерина Коржуеван келсәр, иим бәәдл сурһульчнр медрл авлһнд му нилчән күргжәнә.
Школын директор Екатерина Коржуеван келсәр, спортивн зал уга. Тегәд физкультурин кичәлмүд талдан герт болна. Хот уудг хора болхла талдан герт бәәнә. Энүн күртл тавн зун метр. Тегәд чиогн кичәлмүд хоорнд нег час заврт кех кергтә болв. Үвлднь күнд болна.
Коржуеван тоолврар, хуучн бәәцин таал уга герт сән чинртә медрл сурһульчнрт өгч болшго. Тегәд шин школд дамшлтта багшнрин селвгүд тоод авгдж цуг таал бүрдәгдх. Ик-Буурла района баһчуд сәәнәр сурад, танһчин нер холд туурулж йовна. Хальмг танһчин хамгин сән гисн эрдм-сурһулин учрежденя нер зүүх школ иргч сурһулин жилд секгдх.
Ээнән Ольга, Бадмаран Владислав
