Алцнһуд селәнд Намка Кичиковин зун арвн жилин өөн темдглв
Көтчнрә района Алнцһуд селәнә улс нертә эмч Намка Кичиковин зун арвн жилин өөн темдглв. Намка Долдушевич Цанид Чөөрә хурлын деед буддийск школ төгсәсмн. Зурһан настаһасн авн Бурхн багшин ном экләд дасв, энүнә хөөн Төвдин орн-нутгт одад, тенд сурһуль цаарандан дасв. Төвдин медицина эмчин болн зурхачин диплом авад, төрскн һазртан олн улст дөн болв. Билгтә эмчин тускар мана сюжетд келгджәнә.
Советин йосна цагт Намка Долдушевич Кичиковиг мана танһчд цуг әмтн сәәнәр меддг билә. Энүг әмтн Намка эмч гиж күндлж нерәддг бәәсмн. Чөөрә хурлд йилһән сәәнәр сурад, төвдин медицина болн зурхачин халхар гүн медрл авсн күн. Болв йосн сольгдад, советин йосна цагт Чөөрә хурл хаагдв.элгн-саднань селвгәр Намка эмч гелнгин хувц өмсдгән уурв. Тер бийнь эмчин билгин болн энүнә цаһан седклин тускар олн улс ик холд меддг болв. Новосибирск областьд тууврт бәәсн кемд Намка эмчиг хәәһәд, кесг хальмгуд күнд хаалһ дааһад ирдг бәәж. Цуг ирсн улсиг бүләнәр тосад, олн улс кергтә дөн авдг билә. Тер цагт иим керг күцәхд әәмшгтә билә. Тер бийнь Бурхн багшин номин зәрлгәр, олн әмтн өршәнһү седләсн дөн күргхәр зүткдг билә. Нертә эмчин зун арвн жилин өөн темдглхәр Көтчнрә района Алцнһуд селәнд Элстин цутхлнг хурлын ламнр ирәд, Намка Кичиковин санл тодлж мөргүл күцәв.
Намка эмч бәәсн герт өрүн эртәс авн олн улс ирәд, олн деедс бурхдт зальврж мөргәд, күнд цаглан дөн болсн эмчдән ханлт өргв. Тер цагт өдртнь эмчин герт эгл улс ирж бийән эмнүлдг билә, сөөднь болхла йос бәржәх әмтн ирдг бәәсмн.цуг ирсн улст нөкд болдг билә.талдан улст му келго, хар сана зүүлго, медәтә улсиг күндлх кергтә гиж мана эцк зәрлг болдг билә гиж энүнә ууһн көвүн Санж Кичиков тодлна. Ода иим селвг эврәннь үрүдүдтән өгчәнәв гиж эн келнә. Алцнһуд селәнә ахлач Владимир Дондыковин келсәр, намка эмчин үлдәсн зөөр йир байн. Олн улст туслж йовсн күүнә жирһлин хаалһар баһчуд соньмсх гижс анжанав. Энүнәс үлгүр авад, нег-негндән дөн болад, цаһан седклтәһәр бәәх зөвтә.
Цаг селгәтә. Жил ирвәс мана санлас олн улс болн олн-зүсн йовдл билрж одна. Болв олн әмтн цаһан седләсн туслж йовсн улсин санл мана зүркнәс һарлго, мөнкинд үлдх. Эврәннь аавин герин һаза ачнр-зеенрнь урһ мод суулһв. Намка эмчин герт әмтн урдк кевәр олн олар ирнә. Сиврин тууврт хадһлад авч ирсн энд бәәх олн бурхдын шүтән, эм хадһлдг хуучн чемодан болн талдан чигн шажна тоот нааран ирнс улсин чееж сергәж, зүрк төвкнүлнә.
Нимгрә Валентина, Бадмаран Владислав
