Хальмгт баһ комплектн школмуд күнд бәәдлд тусв
Өдгә цагт мана танһчд баһ комплектн школмуд күнд бәәдлд тусв. Энд көвүд-күүкдт сурһуль дасхд күнд болна, багншр чигн дутжана. Иим школмудт тәвнәс үлү сурһульчнр уга. Зәрм бичкн сурһулин заведеньд арвн көвүд-күүкд сурчана. Иим школмуд яһж көдлхин тускар ода күртл медгдәд уга. Нег халхаснь, школ угаһар селән бәәшго, талдан халхаснь иим сурһулин заведеньсиг мөнгәр теткхд күнд болна. Мана үүдәгч баг Ик-Буурла района Чолун Хамр селәнд одв. Бәәрн школд зун хөрн нәәмн сурһульч бәәнә. Школд ямаран кевәр сурһуль дасхжахин тускар мана сюжетд келгджәнә.
Эдн хамдан школд одна, хамдан гер талан йовна. Нарн Улеев болн Цаһан Касаева класстан нег партд сууна. Иим бат иньглтин учрнь йир эгл — Чолун Хамр селәнә школд арвн негдгч класс зуг хойр сурһульч сурчана. Нарн Улеевин келсәр, күн баһ болхла, иньглт бат болна. Нег-негндән нөкд болнавидн гиж эн келнә.
Тер бийнь класст сурһульчнр баһ болхла нег халхаснь бас му. Нарнд сул цагтан футболд наадг көвүд уга, Цаһан болхла эврәннь нәәж күүкдтән шин хувц үзүлж бардмж чаджахш. Нег үлү, класс хойр сурһульч бәәхлә, өдр болһн багш босхад сурна. Тегәд кичәлдән сәәнәр белдх кергтә болжана. Багшнр болхла иим таалд көдлхдән дурлжана. Сурһульчнр баһ болхла эднә тоолврар, сән медрл өгч болх. Тегәд чигн баһ комплектн школд сурһульч болһнд багш ик оньган тусхана.
Урдк жилмүдт бәәрн школд көвүд-күүкд олн бәәсмн, ик холас бичкдүдин инәдн шууган сонсгддг билә гиж селәнә медәтнр тодлна. Ода болхла бәәдл тас талдан. Жил ирвәс сурһульчнрин то баһрад йовна. Чолун Хамр селәнә школын директор Светлана Бембееван келсәр, ода баһ комплектн школд класст хойр-һуврн сурһульч бәәнә. Эннь бас учрта. Селәнд ода зуг медхтнр үлдв. Баһчуд талдан һазрт көдлмш хәәһәд йовж одна. Баһ наста өрк-бүлмүд уга. Тегхд чигн школд орх көвдү-күүкдин то дегд баһ болна.
Чолун Хамр селәнә школд ода хөрн нәәмн сурһульчиг арвн зурһан багш сурһжана. Селәнд болхла ут-тоодан хойр зун найн дөрвн күн бәәршлжәнә. Бичкдүдин садт болхла зуг зурһан көвүд-күүкд оржана. Болв эдн өсәд, бәәрн школд орхнь маһд. Тер цагт селәнә школ көдлхий аль угай медгджәхш. Иим бәәдл ода танһчин талдан чигн селәдт тогтв. Нег халхаснь иим баһ комплектн школ мөнгхр теткхд үнтә болна, школ уга болхла селән һазрт баһ наста специалистнр ирж көдлшго. Тиигхлә бичкн селәд өөрхн иргчд тас уга болх әәмшг бәәнә.
Азыда Надежда Коллан Церн
