Хальмгин артистнр “Мир Кавказа” фестивальд билг-эрдмән үзүлв
Әәдрхн балһснд «Мир Кавказу» нертә Өмн үзгин регионмудын келн-улсин арвн дөрвдгч фестиваль болв. Энүнд Хальмг танчһас государственн ду-бииһин Бамб цецг ансамбль орлцв. Әәрхнәс хәрж ирнс дару артистнр мана үүдәгч багла фестивалин тускар келж өгв.
Фестивалин гиичнр болн Әәдрхн балһсна бәәрн әмтн хоолан шахад дуулдг ду болн Чичрдг би икәр таасад, кесгтән альхан ташв. Ичирдг би тәвн жилин туршарт олн улсин оньг авлж, хамгин икәр таасгдна.Ансамблин артистнр сольгдад, эн ке-сәәхн би бас сольгдж, уйәс-уйд дамжулж өггджәнә. Нарта-делкән кесг һазрт Бамб цецг Чичрдг би үзүләд, кесг сай улсиг байрлулсмн. Ансамблин артистк Виктория Нимгирован келсәр, олн келн-улсин сойл әдл биш, бидн цугтан тас талдан билг-эрдмтә әмтн болжанавидн.Зуг иим фестивальд харһад, нәәж кевтә нег-негнләһән күүнднәвидн.нег-негнәснь туста дамшлт хоршаж авх арһ учрна.
Фольклорн фестивалин орлцачнрт байр күргж йөрәхин төлә Бамб цецг ансамбльд нәәмн минут өггдв. Эн саамд ансамблин ханьд дөчн күн орв, тер тоод хор, оркестр болн биичнр билг-эрдмән үзүлв. Әәдрхн балһснд болн фестивальд Әрәсән Өмн үзгин арвн зурһан край-областин болн республиксин коллективмуд ирж орлцв. Олн келн-улсин сойл үзүлсн артистнр хоорндан әдл биш болв чигн, хамдан ни-негн бәәж, талдан улсин сойл күндлж меднә. Бамб цецг ансамблин художественн һардач Валерйи Эрдниевин келсәр, иим фестивальд орцлхла, артистнрт олз-туста болна. Мир Кавказу фестивальд иргчдән талдан региомудын элчнр орлцхла сән болх, тер тоод Ижл юолын көвәд бәәх регионмудын артистнр ирж орлцх зөвтә.
Әәдрхнд болсн фестивалин өмн хальмгин артистнр хойр сардан Европд концертмуд өгсмн. Мана танһчин нертә ансамль Париж, Мюнхен, Рим, Прга, Вена балһсдын улсиг өвәрц билг-эрдмәрн байрлулв. Зуг харм төрхд, хол һазрт болдг концертмуд сүл цагт ховр болв. Иим гастроль угаһар, мана артистнр цааранжан девшх арһ уга болх.СССР-ин цагт темдглсн зураһар болдг концертмуд артистнрт сән нилчән күргдг бәәсмн. Тегәд чигн бамб цецг ансамбль талын һазрт одхин өмн өргнд ик белдвр кенә. Удл уга эдн Тамбов балһснд болх фестивальд орлцх.
Хавтхна Элла, Хулхачин Николай
