Яшкульск района Кировский СПК — н көдләчнр эдл-ахун жирн жилин ончта өөнән темдглжәнә
Эн өдрмүдт Яшкульск района Кировский СПК — н көдләчнр эдл-ахун жирн жилин өончта өөнән темдглжәнә. Кесг жилин туршарт эн племзавод сән үзмж бәрәд, Әрәсәд нүүрлгч орм эзлжәнә. Энд өсксн мал цугәрәсән һәәхүлд алтн медаль шүүж авна.
Олинг селәнд ик байр болв, учн өрк-бүл бәәршлдг бичкн поселкд газ ирв. Иим йовдл учрх гиж бәәрн улс иткжәсн уга. Болв кимд түлән нааран бас ирв. Эн жилин хаврар фермин улсла харһлт кехләрн, Кировский племзаводын һардач Бадма Горяев Яшкульск селәнә муниципальн бүрдәцд мөнгнә дөн күргхән медүлв. Мөнг удан эдн күләсн уга. Хойр сар болад селәнд газ ирв. Газин церглтин көдләчнр көдлмшән төгсәһәд уга.Селәнд бәәх дәкәд цөн гермүдт кимд түлә орулх кергтә.Эн жил Кировский СПК өнчта өөнән темдглжәнә. Тегәд бичкн селәнд эннь ик белг болв. Эн медәтә күүкд күүнә келсәр, энд тәвн һурвн жилдән бәәршлжәнә.Оньдин арһсар бешән түлдг билә. Ода йир амр болв. Эн күүкд күүнә келсәр, газ ирснь йир сән болв. Агчмин зуур хотан болһж авч болх. Гер бас дулан.
Олинг селәнд мана үүдәгч баг Цаһан Чимяевала харһад күүндвидн. Урднь мана программд энүнә тускар келгдлә. Хаврар Кировский эдл-ахуд селәнд үлдх баһчудыг күндлж йөрәв.Тер тоод эрдмин лицей төгсәсн Цаһан Чимяева йовна. Эн күүкнд шин техник өггдв. Ода Цаһан эдл-ахун һардврин иткүлиг даавртаһар күәжәнә. Ода Чимяевихна өрк-бүлин бригад эдл-ахуд хамгин сән үзмж бәрж көдлжәнә. Давсн зунын кемд эдн хамгин икәр, долан дундур минһн тонн өвс белдж авв. Ода селәнд газ ирснь эднд бас байрта йовдл болв. Цаһан Чимяеван келсәр, газ ирв, удл уга шин хаалһ тосхгдх. Мана селән цецгәрх зөвтә. Нааран олн улс нүүж ирхлә сән болх.
Кировский племзаводын директор Бадма Горяев эдл-ахун иргч зуран тодрхаһар келж өгв. Энүнә келсәр, газ орулһнд нөкд болвидн.тер мет хаалһ тосхлһнд бас дөн күргх санативидн. Эдл-ахун экономикин күчәр социальн халхд онц оньг өггдх.Ик дамшлтта һардачнр эн төриг хаһлж чадх гиж селәнә улс нәәлжәнә.Кесг жилдән сән үзмжтәһәр көдлжәх Бадма Горяев арвн тавн эргцд эврәннь эдл-ахуһан Әрәсән хамгин сән гисн эдл-ахун тоод һарж чадв. Ода эдл-ахун һардачнр болн малчнр хальмг тохма мал өсклһнә халхд ие оньг тусхажана. Одахн Москва балһснд болсн һәәхүлд Кировский племзаводын курдючн тохма хөн алтн медаль шүүж авв. Ут-тоодан эдл-аху дөчн алтн медаляр ачлгдсмн. Яшкуль послекд болсн мөрнә урдачнд кировцнр хальмг тохма мөрдән үзүлв. Эн керг-үүлдвр эдл-ахун онта өөнд нерәдгдж бүрдәгдв. Эдл-ахун директор Бадма Горяевин келсәр, племзаводын дөрвн мөрн урлджана. Хальмг тохма мөрд зурһан дууна дөрчн зун метрт дөрлдх.Диилвр бәрснь тәвн минһн арлснг мөрә шүүж авх.
Ут-тоодан иөрнә урлданд найн мөрн орлцв. Энүнд талдан района болн хам-хоша бәәх регионмудын элчнр бас ирж дөрлдв. Гиичнрин келсәр, өөнин байрт орцлад, мөрә шүүж авсн деерән, эврәннь малан үзүләд, талдан һазрин мал хәләх күцл эдн тәвжәнә.Эн саамд мөрнә урлдан диилвр бәрсн улс хойр гиигн маши шүүж авв. Ода Кировский эдл-аху талдан регионмудын эдл-ахусла өөрхн залһлда бәрж үүлджәнә. Астраханск областин Чапчачи племзаодын ахлачин дарук Шейх Ахмедовин келсәр, яшкулихн гиичнриг йир сәәнәр тосна. Энд цаһан седлтә сән улс бәәнә.Иим ик байрт орлцхд байрта болв. Яшкулин һазрин улс иим байриг сәәнәр бүрдәж чадна.
Байрин ашар дииләчнр мөрәлгдв. Эн жил мөрән ик зунь талдан һазрин элчнр шүүж авч чадв. Гиигн маши Яшкульск района Чилгр болн Целинн района Западный эдл-ахус шүүж авв. Бәәрн селәнә улс гиичнрт ик ханлтан өргәд, эднд цаһан хаалһ дурдв.
Чучян Валентина, Хулхачин Николай
