Шин кичәл эн жилин сентябрь нег шинәс авн Әрәсән цуг школмудт орулгдх

Эн жилин сентябрь сарин нег шинәс авн “Основы религиозных культур и светской этики” гидг предмет 4-гч классин сурһульчнр эрк биш дасх зөвтә. Хойр жил хооран Әрәсән 20 регионд эн кичәл түрүн болж школмудт күүкд көвүд экләд дасмн.

Эн кичәл 4-гч классин көвүд-күүкдт иргч сурһулин шин жиләс авн эклж дасхмн. Темгдгүд, зачет болн шүүвр сурһульчнр өгшго. Эн кичәл күүндврин эв-арһар дамж давулгдх зурата. Зурһан халхас өггдх кичәләс негнь шүүж авх кергтә. Эннь православн, шар шажна, ислам, иудаизм тер мет нарт-делкән религиозн сойлын болн светск этикин ул болжана. Эн седвәриг хойр жил дарандан эн программ олзлж көдлжәх школмудын багшнр дөннжәнә. Эрдм-сурһулин, сойлын болн номин министерствин кесн то-дигәр ут тоодан дөрвдгч классин һурвн минһн сурһульчнр эн программар дасчана. Хойр зун тәвн шаху багш танһчин шишлн цутхлнгд медрл авв.

17-гч тойгта школын директорин дарук Тамара Басанговна келсәр, эн эксперимент мана школд сәәнәр тохрагдад, күүкд-көвүд эн кичәлиг соньмсж дассн деерән, хурл — чонжд одж медрлән өөдлүлнә.

Олн-зүсн религин авг-бәрцлә болн талдан улсин сойлла өөрхн таньлдхин төлә эн курс күүкдт дасхгджана. Эн төсвин түүрвәчнрин тоолврар, сурһульч болһн бийдән дурта кичәл шүүж авх зөвтә.

Эрдм-сурһулин, сойлын болн номин министрин дарук Ирина Кавкишеван келсәр, йириндән эк-эцкнр бичкдүдин төлә эднд тааста модуль шүүж авна. Гертән эн программин нилчин тускар күүндвр кех кергтә.

Тер хоорнд олна дунд эн курсар ямаран сурһулин дегтрмүд олзлж кичәл даскх күүндвр һарна. Зәрм улсин тоолврар, сурһулин программд дуту-дундс бәәнә. Специалистнр эднә ухан-тоолвриг бас дөннжәнә.

Эн шин предметиг ах классин сурһульчнрт бас заах кергтә гисн төр хәләгдхмн.

Санкун Кермен, Котина Валерий